العودة   ~ منتديات مدينة سنجة ~ > ®¤*~ˆ° الرياضه والاقسام الشبابيه®¤*~ˆ° > المنتدى الرياضى

إضافة رد
 
أدوات الموضوع انواع عرض الموضوع
قديم 03-01-2010, 11:16 PM   #1
a.nigoumi
:: منظمة نهضة شباب سنجه::
 
الصورة الرمزية a.nigoumi
 
تاريخ التسجيل: Feb 2010
المشاركات: 1,068
افتراضي هلاليات

عند الفنان (كمال ترباس) تصريحا شهيرا...نشر له وتناقلته المواقع يقول فيه ترباس: (جني وجن الزول البكون معزوم ويقلب السمكة).

} تصريح ترباس هذا انتشر مثلما انتشرت اغنيته (ما تهتم للايام ظروف بتعدي)..ومثلما انتشرت اغنيته (صدقني ما بقدر اعيد).

} وقد كان ترباس مبدعا في (التصريح) مثلما هو مبدع في اغنيته التي تملأ الطرقات هذه الايام (انت المهم).

} ولا عجب اذا تغني هذا التصريح لكمال ترباس ولحن واصبح يردد في الحفلات والمناسبات العامة.

} توضيحا لهذا التصريح الخطير الذي قاله ترباس ...فان الشخص الذي يتعدي علي (الجهة التانية) من السمكة وهو (معزوم) بعد ان تكون (الجهة الاولي) للسمكة بقت زي (الغربال)..يعتبر انسان عينو قوية...وطبعو كعب.

} وكمان بكون زول مستعجل وقلبو (هبابة).

} المشكلة في ناس بضيقوا بقلبوا (السمكة) قبل الوقت الرسمي ما ينتهي.

} من غير نظام وتكتيك ورؤية.

} يا ود الناس هي (سمكة) وإلا تحليل سياسي.

} ولاد الزمن ديل الواحد لو سألتو من شارع (اوماك) يقوم يعرج في (الانتخابات).

} اصلو ما تغلط وتسأل ليك زول.

} نرجع ليكم للموضوع.

} هسع انتوا ما بتتفقوا معاي انو سعد عمدة النافعاب استعجل وقلب (السمكة) قبل وقت القلبة ما يجي.

} الزول دا بعد اقل من 48 ساعة اقال امين عبدالوهاب.

} العملية دي اخير منها قلبة السمكة.

} هيع ...حالتك (معزوم) في المجلس.

} حالتك دي (مهمش).

} يعني لو ما (مهمش) كنت عملت شنو؟.

} كنت اقلت الامين العام للامم المتحدة.

} اقالة امين عبدالوهاب من منصبه كمدير للكرة قد يكون قرار (صحيح) ..لكنه هو بالتأكيد قرار غير (موفق).

} غايتو يا صلاح ادريس ..اخيرا في زول قدر عليك في المجلس.

} ناس عماد الطيب والطاش لو عارفين موضوع (السمكة) دي وانو اي زول ممكن يقلبها..ما كان استعجلوا وقدموا استقالتهم.

} كان قلبوا السمكة ساي.

} لكن دعوني نرجع للقرار بعيدا عن تصريح كمال ترباس.

} القرار افتقد للتوفيق لأن توقيته لم يكن مناسبا ..اذ يوحي القرار ان المقصود من اقالة امين عبدالوهاب هو صلاح ادريس الذي كان يشكل حماية لمدير الكرة.

} رغم ان القرار فيه قوة للمجلس المتبقي.

} كما ان اتخاذ المجلس لهذا القرار ..ربما يزيد (الشقة) بين مجلس الهلال وصلاح ادريس.

} لكن انت يا صلاح براك قلت ما عاوز.

} يجب علي صلاح ادريس حتي لو لم يستقل ان يتقبل قرار المجلس وان يحترمه ..طالما كان مناديا للديمقراطية وداعيا لها.

} المشكلة الاكبر ان صلاح ادريس حتي بعد استقالته اراد ان يظل اعضاء مجلس الهلال في (تهميشهم) هذا.

} يعني بعد ادارة نادي الهلال من (بيطار) ...صلاح عاوز يدير الهلال من (كافوري).

} لا يا اخوي..الطريقة دي ما بتنفع.

} افضل لينا (قلبة السمكة).

} صلاح ادريس استنكر واستكثر علي مجلس ادارة نادي الهلال ان يصدر قرارا حتي وهو (مستقيل).

} اظن ان غضب صلاح ادريس من (اقالة) امين عبدالوهاب يمثل قمة الدكتاتورية ...هل يريد صلاح ادريس ان يمتثل المجلس لهواه حتي وهو خارج نطاق المجلس.

} ان يقلب سعد العمدة (السمكة) وهو معزوم افضل من ان ينتظر شخص اخر يقلب السمكة وهو (حردان).

} حتي لو كان الزول (الحردان) دا هو صاحب العزومة ..وصاحب السمكة.

} انت موضوع (السمكة) دا ح تطول لينا فيه.

} اعود الي كمال ترباس واقول ان ترباس اشتهر في الصحافة الفنية وفي المجتمع علي وجه عام بتصريحاته الساخنة واللطيفة.

} الناس تذكر لترباس تصريحه الذي قال فيه.. (مشيت اشرب موية لقيت الهلال غلبوه خمسة).

} الناس قالوا ترباس (شرب) الهلال.

} يا ترباس انت اصلك مشيت تشرب من بئر زمزم.

} وإلا مشيت تشرب من (المحيط المتجمد الشمالي)...ووقت وصلت هناك لقيت المحيط قاطع.

} طبعا محيطات الزمن دا عادي تقطع.

} يبقي تصريح كمال ترباس جميل وسريع وقدر بكلماته تلك ان يلخص خسارة الهلال الذي خسر نتيجة تلك المباراة في 15 دقيقة.

} ترباس ايضا مرة قال في تصريح خاص لصحيفة فنون انه (مثل البيبسي..البشربني بهضم ليه ...والبخجني بطلع ليه بي نخرتو).

} وافتكر ان هناك (خجة) حصلت في الهلال.

} وهناك من يحاول ان يخرج بالنخرة.

} الاحداث في مجلس ادارة نادي الهلال تنذر بالخطر.

} ما معقول كل يوم نقوم الصباح نلقي لينا واحد من مجلس ادارة نادي الهلال استقال.

} صلاح ادريس قال متمسك بي استقالتو.

} وسعد العمدة متمسك بي اقالة امين عبدالوهاب.

} ان الاحداث الاخيرة اثبتت ان الخلل الذي كان يعاني منه الهلال في السنوات الماضية ..كله كان يتمثل في مجلس الادارة..اذ كان الخلل خلل ادري وإلا ما ظهرت كل هذه العيوب في مجلس ادارة نادي الهلال في هذا الوقت.

} لا يعقل ان يكون مجلس ادارة نادي الهلال بهذه (الهشاشة) التي تجعل اربعة من ضباط واعضاء المجلس يستقيلون.

} كيف كانت تسير الامور في الهلال في الفترة الماضية..ومجلس الهلال بهذا التناقض والتنافر.

} لقد وضح الان ان كل انجازات الهلال في السنوات الماضية تحققت بفضل اجتهاد لاعبي الهلال.

} لاعبو الهلال يستحقوا ان نقف معهم وان نساندهم بقوة في ظل هذه الظروف.

} الهلال يعاني من فراغ اداري كبير..ولا امكانية من سد هذا الفراغ إلا بالاستعانة بجماهير الهلال لتكون مع لاعبي الهلال.

} كان يمكن للهلال ان يحقق بطولات خارجية في السنوات الماضية لو كان الهلال يمتلك مجلسا متماسكا وقويا.

} لا يعقل والهلال في بدايات موسمه الرياضي ان يتعرض لكل هذه الاستقالات.

} واستقالات من من؟.

} استقالات من اعضاء مجلس ادارة نادي الهلال.

} مجلس ادارة نادي الهلال هذا تبقي لدورته 9 شهور ..كان يمكن لمجلس ادارة نادي الهلال ان يتماسك فيها بمقدار ان يكمل دورته لا غير.

} بدلا ان يتبادل اعضاء المجلس التصريحات في الصحف والاذاعات.

} هل يعقل ونحن في هذا التوقيت ان تكون استقالة صلاح ادريس هي موضوع كل الصحف وموضوع كل الاعمدة.

} اذا اراد صلاح ادريس ان يخرج من مجلس الهلال ..نرجو ان يخرج في هدوء.

} اننا نحترم في عماد الطيب صمته وذهابه الحكيم هذا.

} نحترم في العمدة هذا...وان اختلفنا في استقالته.

} ملحوظة: في زول بقلب السمكة في الوقت دا.

هوامش

} غايتو يا ناس المريخ لو دا فريقكم...يبقي الهلال ما محتاج ليه لي مجلس ادارة.

} استقيلوا ساكت يا صلاح.

} الوصيف دا وصيف في كل الحالات.

} وارغو دا مفروض يزيدوه اربعين جلدة تاني.

} يعني مفروض يجلدوه 80 جلدة.

} اربعين شوية عليه.

} الشوط الاول شوط اللاعبين.

} والشوط التاني شوط الاداريين.

} ناس المريخ فرحانين بالدخل.

} الاستاد قالوا ليك كلو كان (حبش).

} يعني يا ناس المريخ ما عندكم اي زول استادكم دا.

} غير (الحكم)..ما شفنا ليكم شيء.

} ضربة الجزاء لو حصل فيها (وفاة) عديل الحكم ما بحتسبها.

} حافظ طلع بالنقالة...مفروض كان يطلع بالكرت الاحمر.

} اصابة حافظ لا تعني انه لا يستحق الكرت الاحمر.

} وطالما يوجد كرت احمر فذلك يعني ان هناك ضربة جزاء.

} في التمهيدي يا ناس المريخ بتحتاجوا لمساعدة الحكام.

} انتوا (النفطي وطمبل) كانوا مشاركين في المباراة.

} غايتو طمبل يمكن.

} النفطي دا ما شفتو.

} لو المريخ اعار السعودي ...كان امل المريخ سوف يكون في (الحكم).

} وارغو واضح انه بعاني من مرض (الخلعة).

} زولكم دا مخلوع من (منير ام بدة).

} الجلاد منير ما لاعب يا وارغو.

} انت قايل منير مع اي فريق.

} العجب بقينا بنشوفو مع الحكم الرابع.

} الحكم الرابع طبعا ما زول بشوفو إلا وقت يرفع الزمن البدل الضائع.

} ناس الخرطوم السنة دي لو شدوا حيلهم بحرزوا المركز الثاني في الدوري الممتاز.

} لو دا فريقكم...تاني ما تكتبوا لينا عن كورة القدم.

} اكتبوا عن السلة.

} عن الطائرة.

} عن السباحة.

} املكم في (كرة القدم) ضعيف.

} ما عندكم فرصة.

} اقول ليكم حاجة.

} ارجعوا تاني لي موضوع (الايميل).

} اخير ليكم افتحوا السيرة دي من هسع.

} ان شاءالله تتكلموا عن استقالة صلاح ادريس.

} قالوا صلاح ادريس قدم استقالتو بالايميل.

} خبر عاجل: سادومبا قالوا مسك ملف محمد كمال.
a.nigoumi غير متواجد حالياً   رد مع اقتباس
قديم 03-03-2010, 07:39 PM   #2
a.nigoumi
:: منظمة نهضة شباب سنجه::
 
الصورة الرمزية a.nigoumi
 
تاريخ التسجيل: Feb 2010
المشاركات: 1,068
افتراضي

عندما بدأت التسجيلات...طلع (شريط) جديد لكورال المريخ...شريط جديد اسمو (النفطي).

< والليلة وين لي وين يا عنيا انا..عجبوني كالوا العين...يا عينيا انا.

< النفطي اخطر لاعب...النفطي صانع العاب...النفطي ما في زول متلو.

< وعجبوني الليلة جوا ترسوا البحر رجعوا.

< وكان مع شريط النفطي هذا..تقدم هدية اسمها (هيثم المرابط).

< طبعا المريخاب عندهم عقدة من اسم (هيثم).

< جابوا هيثم الرشيد ...ما نفع..ما خارج معاهم.

< جابوا هيثم طمبل ...المدرب بقي يطلعو من الـ 18.

< مليار وبرة التشكيلة.

< هيثم طمبل دا تقول شغال في مصلحة تلفونات...اثر ما في ليه في (الوصيف).

< مرقوها لي تونس وفتشوا ليهم عن لاعب اسمو (هيثم).

< ان شاء الله يكون لاعب سباق خيل...المهم يكون اسمو (هيثم).

< في تونس قالوا ليهم في لاعب اسمو (هيثم).

< لكن بس فيه عيب واحد. قالوا ليهم عيبوا شنو؟.

< قالوا عيبوا انو (مرابط).

< عشان كدا ناس المريخ ديل قدر ما حاولوا يحركوا (المرابط) دا ما قدرو.

< هو اسمو (مرابط)...يجيكم هنا كيف يا جماعة.

< حكاية هيثم دا ..زي النكتة بتاعة محمد موسي.

< النكتة بتقول في ولد طفل صغير اسمو (هيثم) راح ..وضاع في مناسبة واهلو ما لقوه. المناسبة كلها اتقلبت بحثا عن الولد هيثم.

< الحلة دي وقفت علي فد كراع.

< في واحد كان غريب في المناسبة سمع الناس يفتشوا عن (هيثم) افتكر (الشافع) بستاهل الكواسة دي.

< خالات هيثم وعماتو واقفات يتقالدن في الشارع متل قطر المشترك المكسورة فيه عربية في الخلا.

< الزول الغريب قايل هيثم دا زول يستاهل.

< وقت في جماعة جوا من غادي سايقين (هيثم)...الاضنين متل (الكوريك)..والعين تكوريك للعين يجري بيناتهم الحصان.....الزول الغريب قال ليهم دا (هيثمكم)...انا الزول دا مريت فيه سبع مرات.

< ناس المريخ هسع عندهم عقدة اسمها (هيثم).

< في واحد قال ليهم انتوا عقدتكم دي ما بتتفكا إلا تسجلوا ليكم حارس مرمي اسمو (هيثم).

< انتوا سمعتوا ليكم حارس مرمي اسمو (تامر).

< وإلا شفتوا ليكم (باك) اسمو (قصي).

< ناس الهلال ديل زمان كان عندهم حارس اسمو (هشام الطيب).

< ناس السعودية طوالي لبسوه (حليب السعودية).

< قالوا دي فرصة ...ما في حارس مرمي في الدنيا اسمو (هشام).

< طبعا ممكن واحد منكم يقول لي طيب (هشام السليني) دا كان بطل رواية لاحسان عبدالقدوس.

< في الحالة دي بقول ليكم..يا جماعة اي قاعدة فيها استثناء.

< انتوا درستوا وين؟.

< ارجع ليكم للمريخاب.

< عليكم الله ..بدون غلاط كدا ...في التسجيلات شفتوا (اعلام المريخ) دا كان بيكتب في شنو؟. شفقتونا ساكت.

< حمد الشجرة دا عملوه لينا رونالدينو إلا ربع.

< ديل علاءالدين امبدة عملوا ليه توم وشمار.

< قلنا ما مشكلة...اصلو نحن الحاجات دي متعودين عليها. قام المريخ مشي عسكر في كينيا. شهر كامل الجماعة قاعدين في كينيا.

< طبعا في معسكر كينيا ما في زول كان بشوفهم.

< عشان كدا كانوا بكذبوا ساكت. نحن لمن صدقنا.

< النفطي يسجل هدفا يلخص به كل اهداف كأس العالم 1986.

< ونحن نشيل ونصدق...قلنا يمكن الكلام دا يكون بالجد المرة دي.

< حمد الشجرة يدهش كاربوني. وكاسروكا يبدد مخاوف المريخاب.

< كاسروكا دا عندو عمود براه...يوم خاص.

< وفي تمارين المريخ كنا بنسمع. طارق مختار يعمل العجائب...والعجب يرجع زي زمان. ونحن نشيل ونصدق.

< قلنا يمكن. احتمال ما في حاجة بعيدة.

< الجماعة ديل من كذبهم...محمد كمال ذاتو قالوا اتألق.

< محمد كمال ...البفك الكورة قبل ما يمسكها.

< نحن ما نكذب عليكم...قلنا السنة دي (وصافة) المريخ دي محمدانا.

< خاصة اعداد الهلال كان لم يبدأ بعد.

< ويوسف محمد تعرض لأصابة خطيرة.

< وامولادي رجع. وكلو كوم وعودة امولادي كوم براه.

< نحن امولادي نوديه وين في الظروف دي. المريخاب معنوياتهم ارتفعت.

< بقوا يزيدوا في الكلام. ونحن نشيل ونصدق.

< اتاريهم الجماعة كانوا بكذبوا علينا.

< غايتو المريخ دا لو عسكر اسبوع تاني في كينيا كان جاب كأس العالم. الجماعة ديل من كذبهم ...سجلوا الحضري عديل كدا.

< نسوا حكاية ما في حارس مرمي اجنبي بيلعب في الاندية السودانية.

< ونسوا انو تجنيس الحراس غير مسموح به.

< ونسوا انو الاسماعيلي ذاتو ما بفك الحضري بي اخوي واخوك.

< نسوا الحاجات دي كلها وسجلوا الحضري.

< الايامات مرت والجماعة رجعوا من كينيا.

< قلنا خلاص بختنا ح نشوف المريخ البتكلموا عنو دا.

< اول مباراة مشوا لعبوا في كادوقلي.

< الكورة هناك بعد معسكر كينيا ورحلة اديس ابابا انتهت 4-2.

< قلنا ما مشكلة...يمكن كادقلي يكون فيها (مطر).

< والارضية ذاتها يمكن تكون كعبة.

< الجماعة رجعوا لعبوا مباراة مع الخرطوم انتهت 4-3.

< والمريخ كان مغلوب تلاتة.

< قلنا ما مشكلة...الفاتح النقر بقفل.

< طيب ما يقفل..انتوا ما بتعرفوا تتصرفوا مع (التقفيل) دا.

< قلنا (الارضية) يمكن تكون كعبة.

< قلنا ما ممكن طبعا...لأن المريخ لاعب في استادو.

< قلنا المطر.

< قالوا لينا الخرطوم 4 شهور ما شافت ليها (مطرة).

< قلنا ليهم الاسكندرية لكن كان فيها مطر ..يمكن تكون اثرت في استاد المريخ. بعدين الايامات دي في برد...والمباراة ذاتها ودية.

< قلنا خلاص نحن ح نشوف المريخ قدام سان جورج.

< قعدنا للمباراة ..اول طسة...الشروق ذاتها..طشت.. قطعت.

< مشينا الراديو...جينا راجعين للتلفزيون.

< ساعة كاملة انا بفتش في (النفطي).

< معقولة دا (النفطي)...طيب النفطي فرقو شنو من موسي الزومة؟.

< غايتو عندكم جنس (نفطي) يا مريخاب.

< بخت سامي عبدالله. نفطيكم دا من الاسبوع الرابع بقطع.

< وارغو طبعا ما بخلي عادتو...تقول لاعب في (طين).

< يا وارغو انت ليه بتعمل كدا. معقولة الي الان ما قادر تتأقلم.

< معقولة بس. والله يا حليل العجب.

< المريخ دا لو ما مرقو (الحكم) كان بطلع من دور الـ 64.

< الله شافكم ساكت.وينو النفطي الكنتو بتتكلمو عنو في (كينيا).

< وينو (حمد الشجرة). الشجرة طلعوه من القائمة.

< مفروض مجلس ادارة نادي المريخ يصدر قرار ان اي زول يدخل مباريات المريخ تعصب عيونه.

< يربطوه بعصابة عديل كدا..عشان اعلام المريخ يأخذ راحتو في الكلام.

< عشان تكذبوا بي مزاج. بعدين مفروض تاني ما تنقلوا ليكم كورة في التلفزيون...(ضربات الجزاء) التي لا يحسبوها ضدكم شينة في حقكم.

< مفروض تكتفوا بالراديو. مالكم ومال الفضائح دي.

< فريقكم دا بذكرني بي ولد زمان في الحلة كان الناس بقولوا ليه (بلاتيني).

< بلاتيني دا كان وقت بتشوفو يسخن بتقول خلاص الليلة الزول دا ح يجيب ليه عشرة اقوان. تسخينتو عجيبة.

< واللبس بتاعو اسكتو خلاوه ساكت.

< الشنكار ايطالي ...والشرابات اسبانية ...والجزمة المانية..والفانلة فانلة بلاتيني. تشوف الحاجات دي وهو بسخن..رأسك يضرب.

< زولكم دا وقت الكورة تبدأ ما بتشوف منو اي حاجة.

< كورة ما بهبشها. زولكم (دعاية) ساكت.

< الحاجة البتغيظ...ما لبسو ولا تسخينتو.

< الحاجة البتغيظ اسمو (بلاتيني).

< والله انت بلاتيني يشوفك ...إلا يقطع ليك اضنينك ديل.

< روح بلا بلاتيني معاك.

< ناس المريخ ديل ...سماحة الطابق التاني ساكت.

< سماحة التسخينة..وقت المنافسات تبدأ ما بنشوف ليهم اي حاجة.

< ملحوظة: سانجورتنا ساكت.

هوامش

< جمال الوالي قنع من الكورة...مشي يشوف ليه (دائرة) يترشح فيها.

< ناس مدني بستفيدوا شنو من (طابقك التاني) دا؟.

< مباراة الهلال امام الاهلي مدني تكتسب اهمية كبري.

< يجب ان يستعد الهلال لهذه المباراة استعداد خاص.

< حسنا لعب الهلال امام الميرغني ونتمني ان يوفق ويلعب كذلك مباراة امام اتراكو.

< الاهلي مدني من الاندية القوية وهو صاحب اداء جميل.

< لكن الحمدلله الهلال وصل لمستوي جيد..ومستواه امام الاهلي الخرطوم في المباراة الاخيرة مبشر.

< محمد احمد بشة اثبت انه اضافة كبيرة لوسط الهلال.

< مع تألق فييرا يبقي لا خوف علي الهلال.

< الهلال تجاوز (الخطر) امام جزيرة الفيل.

< فقط نتمني ألا تؤثر الخلافات الادارية في الهلال.

< لكن واضح الان ان سعد العمدة يقود الهلال بتخطيط جيد.

< خبر عاجل: لو دا فريقكم...انتظروا (التسجيلات) القادمة.
a.nigoumi غير متواجد حالياً   رد مع اقتباس
قديم 03-06-2010, 07:53 PM   #3
a.nigoumi
:: منظمة نهضة شباب سنجه::
 
الصورة الرمزية a.nigoumi
 
تاريخ التسجيل: Feb 2010
المشاركات: 1,068
افتراضي

لايمكن ان نكابر على حق مجلس ادارة نادى المريخ فى محاسبة المدرب كاربونى اذا شعر المجلس بان المدرب لايقوم بعمله على النحو المطلوب طالما ان تقييم عمل المدرب والحكم عليه يتم من خلال المردود الفنى للفريق والنتائج الايجابية التى يفترض ان يحصل عليها من خلال المباريات التنافسية او الودية ,, ونعلم ان هذا الامر ليس بالامر الصعب على رئيس النادى او ايا من زملائه فى مجلس الادارة ولكن قبل ان يخضع المجلس المدرب للمحاسبة والمساءلة من الافضل ان يستعين برأى الخبراء فى هذا المجال من ابناء المريخ وعلى راسهم زيدان وسيد سليم ومازدا مثلا ليعرف منهم ان كان تدنى مستوى الفريق فى المباريات يعود الى عمل المدرب كاربونى ام بعض اللاعبين المتقاعسين ,, وهل من الصواب ان تتم محاسبته ومساءلته وهو لازال فى بداية عمله بالفريق ام يمنح الفرصة حتى يقف على مستوى جميع اللاعبين والوقوف على قدراتهم ؟؟ ليس عيبا ان يستشير مجلس الادارة الخبراء فى مجال التدريب من الاسماء التى ذكرتها او غيرهم من الذين يثق رئيس النادى فى رايهم مثلما استعان بهم قبل فترة التسجيلات الاخيرة ,, فالمجلس اذا فعل ذلك فهو لايأتى ببدعة انما هذا نهج معروف مطبق فى كل الاندية الكبيرة التى تحترم صلاحيات الفنيين وعمل المدرب وتخصص لهم دائرة كاملة مهمتها رفع التقارير الفنية ووضعها على طاولة الادارة حتى تصدر القرارات على ضوئها ,, هذا ليس قدحا فى الخطوة التى اقدم عليها جمال الوالى بالاجتماع مع المدرب كاربونى ومساءلته عن اسباب تدنى مستوى الفريق فى مباراته امام اتحاد مدنى ومطالبته له بضرورة معالجة الاخطاء الفنية حتى يرتقى بالمستوى الفنى فى المباريات القادمة ,, بل اشدنا بهذه الخطوة التى وصفناها بانها حسن تقدير من جانب الوالى لخطورة الموقف اذا استمر الفريق يتراجع من

مباراة لاخرى ,, ولكن مأخذنا على مثل هذه الاجتماعات انها تعطى انطباعا لهؤلاء المدربين الكبار مثل كاربونى ان محاسبتهم تتم بالقطعة دون ان يمنحوا الفرصة المناسبة لتجويد عملهم بالتدرج فى الاداء مما يضع المدرب خلال فترة قصيرة تحت الضغط الاعلامى والجماهيرى على نحو مايحدث هذه الايام حيث لايخلو اى عمود صحفى مريخى من الهجوم على المدرب كاربونى كرد فعل على التشكيلة التى خاض بها مباراة الاتحاد والنتيجة المتواضعة التى انتهت عليها المباراة ,, رغم ثقتنا فى ان المدرب البرازيلى لن يغير طريقة اللعب التى اختارها للفريق ولن يتخلى عن لاعب لانه لايتوافق مع مزاج من يكتبون ,, وسيظل يؤدى عمله الفنى وفقا لقناعاته الذاتية ,, فلا خوف من ان يؤثر الهجوم الاعلامى على عمل المدرب ولكن الخوف كله فى ان مجلس ادارة نادى المريخ الحالى لن يتردد فى اتخاذ قرار سالب ومتسرع ينهى مسيرة المدرب كاربونى مع المريخ اذا شعر انه بمثل هذا القرار يمكنه ارضاء من يهاجمون المدرب ,, فقد عودنا مجلس الادارة على مثل هذه القرارات التى كانت حصيلتها فى الموسم الماضى اربعة مدربين تعاقبوا على تدريب المريخ ابرزهم كروجر وكانت المحصلة النهائية فى ختام الموسم صفر كبير !!

ندعو مجلس الادارة ان يهيىء الاجواء الصحية للمدرب كاربونى فهو مدرب كبير وقدير وان عودته من الاجازة التى قضاها فى بلده فى الموعد الذى حدده له مجلس الادارة والتزامه بالاشراف على المعسكر الاعدادى فى كينيا صباحا ومساءا كل ذلك يؤكد انه راغب فى اكمال فترة تعاقده مع المريخ ويسعى الى تحقيق انجازات معه تحسن من مسيرته التدريبية وان ماوجده فى المريخ ربما لم يتوفر له فى اندية اخرى ولهذا من الافضل ان يتركه المجلس يعمل حتى يكمل مابدأه مع المريخ ويمنحه المزيد والمزيد من الصلاحيات ,, فاى مدرب يشعر بانه عرضة للمحاسبة والمساءلة عقب كل مباراة لن يستطيع ان يوفر الاستقرار الفنى للفريق .
a.nigoumi غير متواجد حالياً   رد مع اقتباس
قديم 03-24-2010, 11:32 AM   #4
a.nigoumi
:: منظمة نهضة شباب سنجه::
 
الصورة الرمزية a.nigoumi
 
تاريخ التسجيل: Feb 2010
المشاركات: 1,068
افتراضي

تبقي اقل من ثلاثة شهور للتسجيلات التكميلية ،باعتبار انها سوف تنطلق في 15 يونيو، وهذا يفرض علي الهلال ان يضع استراتيجته منذ الان للتسجيلات، لا سيما وان الهلال في التسجيلات القادمة يمتلك خانة خالية هي خانة المحترف يوسف محمد.

} ادارة نادي الهلال مطلوب منها ان تعرف جاهزية يوسف محمد وهل يمكن ان يكون مفيدا للفريق في المرحلة المقبلة ام لا؟.

} ومطلوب من الهلال ان يحسم مبكرا امر هذه الخانة..هل سوف يجنس فيها الهلال لاعبا ام يسجل لاعبا اجنبيا عن طريق الاعارة؟.

} المريخ سوف تكون امامه فرصة لتجنيس لاعب اجنبي بديلا للاعبه الراحل ايداهور ، ويمكن للهلال ان يجنس لاعبا بديلا للاعبه ايفوسا اذا وجد انه لن يستفيد من عودة ايفوسا.

} الكثير من الامور يجب معالجتها ودراستها مبكرا قبل ان تنطلق فترة التسجيلات حتي لا نقع في الاخطاء التي ظل يقع فيها مجلس ادارة الهلال وكان الفريق يدفع ثمنها غاليا في كل موسم.

} الهلال حرم من يوسف محمد وحرم كذلك من امولادي وذلك كان نتيجة لأن مجلس ادارة نادي الهلال لم يتحرك في هذا الجانب إلا في اللحظات الاخيرة وبعد فوات الاوان.

} كذلك اعار الهلال لاعبه المجنس ايفوسا دون ان يستفيد من خانته اذ توجد خانة الان شاغرة في كشف الهلال.

} علما ان حمودة بشير مصاب يتعالج في دولة الامارات بينما يوجد النعيم رونالدينو مصابا في القاهرة.

} هذا يؤكد النقص الكبير الذي يعاني منه الهلال..واذا تقدم الهلال في البطولة الافريقية سوف يفقد الكثير من عناصره لا قدر الله بسبب الاصابات والايقافات الي جانب ان التقدم في الدوري الممتاز هو الاخر سوف يزيد من نسبة الاصابات وسط لاعبي الهلال.

} شيء اخر يجب ان يلتفت له الهلال وهو ان مرمي الهلال فيه المعز محجوب وعبدالرحمن الدعيع ولاعب السنية محمد حمزة وهذا يستوجب من الهلال اضافة حارس مرمي اخر حتي نتجنب هذه المخاطر.

} ايضا علي مجلس الهلال ان يتحرك مبكرا في موضوع تسجيل بكري المدينة وفيصل موسي من اجل ان يستثني الاتحاد العام المدينة وفيصل حتي يسمح لهما بالتسجيل في كشوفات الهلال.

} اذا فشل الهلال في ذلك الامر وعجز في الحصول علي استثناء لهما عليه ان يبحث عن بديل لهما، حتي يسجل المدينة وفيصل في ديسمبر القادم.

} المهم هنا ان تكون هناك رعاية فنية ومتابعة لبكري المدينة وفيصل موسي حتي يكونا في كامل جاهزيتهما ولا يفقدان فورمة اللعب في الهلال ولا ينال (الاحباط) من معنوياتهما فتدمر موهبة لاعبين ينتظر منهما الكثير.

} الشيء الخطير الاخر هو ان الهلال مثل المريخ سوف يكون مطلوبا منه ان يعدل اوضاع لاعبي المرحلة السنية.

} في المريخ هناك (وارغو) وفي الهلال هناك امادو وجعفر بركية.

} هذه الخطوة تتبعها تحركات اخري وهي ان يرصد الهلال منذ الان لاعبين من المراحل السنية ليسجلوا في خانة امادو وبركية بعد تصعيدهما.

} نخشي ان يضحي الهلال في ظل هذه الظروف بلاعبه جعفر بركية الذي ينتظر منه الكثير.

} ما يهمنا الان هو ان يحسب مجلس ادارة نادي الهلال خطواته مبكرا وان يعرف ماذا سوف يفعل في التسجيلات القادمة..حتي لا يقع المجلس فيما ظل يقع فيه دائما.

} علما ان الهلال يحتاج الي مراجعات في التسجيلات التكميلية اذا كان الهلال يريد ان يحقق بطولة خارجية واراد ان يحافظ علي بطولاته المحلية التي حققها الفريق في الموسم الماضي.

} البطولات المحلية يمكن للهلال ان يحققها بوضعه الحالي حتي وان لعب بتشكيلة قوامها من لاعبي المراحل السنية لأن مستوي المريخ في هذا الموسم (ضعيف) وليست هناك مخاطر او مخاوف يمكن ان يشكلها المريخ علي الهلال.

} لكن نحن نتحدث عن البطولات الخارجية وهي امر يجب ان يوليه مجلس ادارة نادي الهلال اهتماما اكبر ، وذلك لن يكون إلا عبر اعادة ترتيب الاوراق في الهلال واضافة لاعبين لكشوفات الهلال يمكن ان يستفيد منهم الهلال في المرحلة المقبلة.

} موضوع عثمان امادو وتأخره في نيجيريا من بعثة الهلال وطموحاته التي اتجهت نحو اللعب في فرنسا قد تضعف مردود اللاعب الفني ، وعلي افضل الفروض فان انشغال اللاعب بالعرض الفرنسي سوف ينقص منه الكثير.

} مجلس ادارة نادي الهلال عليه ان يتعامل في هذا الموضوع بحسم وان لا يجاري اللاعب في احلامه وطموحه.

} غير كل هذا فان توفير المناخ الملائم ومراعاة استقرار الفريق امر لا بد ان يعطيه المجلس عناية اكبر.

} نتمني في الفترة القادمة ألا تكون هناك صراعات وخلافات داخل مجلس ادارة نادي الهلال وان يتجاوز اعضاء المجلس صغائر الامور من اجل استقرار المجلس واستقرار الهلال بشكل عام.

} اي صراعات او استقالات في المرحلة المقبلة سوف تضعف الهلال..وهذا ما يجب ان ينتبه له اعضاء مجلس الهلال.

} كذلك لا بد من مساعدة كامبوس في تثبيت نظرياته الفنية وفي توفير مناخ مناسب للفرقة الزرقاء يجعلها تبدع وتذهب بعيدا.

} لاعبو الهلال في المرحلة الماضية كانوا عند حسن الظن بهم ومضوا بالهلال نحو الامام رغم الظروف الصعبة التي كان يمر بها الهلال لدرجة ان الفنادق اصبحت تطارد الهلال بالمحاكم والمحاضر.

} لاعبو الهلال في ظل هذه الظروف تماسكوا وكان حضورهم في كل الميادين قويا وعبروا بالهلال من اخطر المراحل.

} المرحلة القادمة ان شاء الله سوف تكون افضل واحسن.

} في مصر هناك صراع كبير بين الاهلي والزمالك حول نجوم الساحة الرياضية خاصة ان الاهلي المصري يحتاج الي ان يجدد دماء الفريق.

} حسام البدري بدأ يعمل للتخلص من نجومه الكبار من اجل ادخال نجوم صغار في السن لكشف الاهلي المصري ولتشكيلته فيما بعد.

} ووصل الصراع الخفي بين حسام البدري ونجوم الاهلي الكبار الي حد ان نجم الاهلي بركات اصبح يبحث عن الهجرة والاحتراف في الخليج.

} كما يعمل حسام البدري للتخلص بشيء او بآخر من احمد حسن الذي رفض ان يجلس في الكنبة او ان يستبدل باعتباره كابتن المنتخب المصري وتاريخه لا يسمح له ان يستبدل.

} وهنا يطيب لنا ان نذكر هيثم مصطفي الذي لم يرفض الجلوس علي كنبة الاحتياطي او الاستبدال اثناء المباراة وهذا شيء يحسب في صالح هيثم مصطفي.

} كما يحسب لنجم المريخ فيصل العجب الذي لا يرفض الاستبدال ولا يرفض حتي ان يدخل للمشاركة في اخر اربع دقائق من عمر المباراة كما فعل معه مازدا وكما يفعل معه مدرب المريخ الحالي كاربوني.

} يجب ان يتعلم نجوم الهلال والمريخ من هيثم والعجب لأنهما يقدمان الان نموذجا مشرفا للاعب الكبير والمحترم.

} اعود الي صراع التسجيلات في مصر واقول بعد ان وجه ابراهيم حسن صفعة قوية لعادل القيعي في اللاعب ياسر حسين المحمدي يبحث القيعي عن رد الصاع لابراهيم حسن وذلك بافساد صفقة محترف اجنبي اوشك ابراهيم حسن علي اكمالها.

} نجوم التسجيلات في مصر والذين يدور حولهم الصراع بين الاهلي والزمالك هم مهاجم بتروجيت السيد حمدي ومهاجم بتروجيت الغاني هداف الدوري المصري.

} وهناك ايضا شوقي السعيد واحمد عمران وعاشور الادهم مما يعني ان الاهلي يبحث عن تقوية فريقه بعد المستوي الضعيف الذي ظهر به الاهلي اخيرا وخسارته الاخيرة خارج مصر في البطولة الافريقية.

} مهم ان نعرف خطوات الاهلي المصري ..لأن حظوظ الاهلي تبقي الاكبر مع مستواه هذا في الوصول مراحل متقدمة في البطولة الافريقية.

} الزمالك المصري يخطط لتسجيل عصام الحضري غير ان حارس الزمالك عبدالواحد السيد هدد بالرحيل في حالة تسجيل الحضري.

} ما يهم هنا ان العلاقة متوترة بين عصام الحضري والاسماعيلي ونتمني ان تظل متوترة الي ان تلعب مباراة الهلال والاسماعيلي في البطولة الافريقية.

} ملحوظة: وخليكم جاهزين.

هوامش

} مباراة الهلال امام هلال كادوقلي حذراي من التعامل معها باستهتار او تهاون.

} فقدان اية نقطة للهلال في هذه المباراة سوف يتبعه فقدان الكثير من النقاط.

} جميل ان كامبوس مُصر علي قيام المباراة وهذا وحده امر يعطي لاعبي الهلال الثقة.

} يجب عدم الالتفات للارهاق والتعب.

} اختفي من تشكيلة الهلال جعفر بركية ..واصبحت مشاركة امبيلي قليلة مع الهلال.

} عدم مشاركة بركية قد تؤدي للتضحية به في التسجيلات التكميلية.

} امبيلي مهاجم يجب ان يكون في تشكيلة الهلال.

} الهلال قبل مواجهة الاسماعيلي اذا قدر لهما ان يصعدا للمرحلة المقبلة يحتاج الي معسكر مقفول اسبوع او عشرة ايام لأن خطة كامبوس واسلوبه الحديث لم يهضمه لاعبو الهلال حتي الان.

} المريخ فقد بصورة واضحة عبدالكريم الدافي.

} هذا مع الفقد الكبير لايداهور.

} بكري المدينة وفيصل موسي يجب مراعاتهما فنيا من قبل الهلال..لأن تسجيلهما للهلال سوف يفيد الهلال مستقبلا فنيا لذا وجبت رعايتهما فنيا.

} سادومبا لاعب بعطش (الباكات).

} وبعطش جمهور الفريق الخصم ايضا.

} خبر عاجل: غزالة وربنا راضي عليها.
a.nigoumi غير متواجد حالياً   رد مع اقتباس
قديم 04-01-2010, 08:45 PM   #5
a.nigoumi
:: منظمة نهضة شباب سنجه::
 
الصورة الرمزية a.nigoumi
 
تاريخ التسجيل: Feb 2010
المشاركات: 1,068
افتراضي

} كان يفترض ان اواصل الحديث عن ازمة الهلال الاخيرة وتراجع مستواه الفني والخلاف الذي ظهر علي السطح وبدأ (خفيا) ان هناك حربا تدبر قصد بها لاعب الهلال هيثم مصطفي.

} وما نأسف له في هذه الحرب ..ان المعركة تلك يقودها بعض الذين يجلسون علي دكة الاحتياطي ويتبوأون منصبا كان يجب ان يتحلوا فيه بالامانة والاخلاص ..بدلا من ان يبدلوا مهمتهم لنقل الكلام من والي.

} نسكت عن هذه السيرة الان مؤقتا..ونسأل الله ان يتم احتواء الازمة..وان يعود الهلال معافيا من كل سوء.

} قلنا ان الفتور الاداري في الهلال ظهرت آثاره في نواحي شتي... وظهرت هناك فراغات كان لا بد ان تجعل الذين يحسنون الصيد في الماء العكر للتحرك لافساد المزيد من الاجواء.

} الهلال الان فنيا اقرب الي انه يدار بقوانين (الطواريء الفنية).

} كامبوس تارة يلعب بمهاجم واحد وتارة بمهاجين وتارة بثلاثة مهاجمين ...مما افقد ذلك الهلال استقراره الفني وشكله الذي كان يعرف به.

} الهلال في كل مباراة عاوزين لينا ربع ساعة عشان نعرفو.

} اعتقد ان كل هذه الازمات وكل هذه الخلافات سببها الفراغ الاداري الذي يعاني منه الهلال حاليا...عليه فان مجلس ادارة نادي الهلال يتحمل المسؤولية كاملة في هذا التراجع.

} اضف الي كل ذلك ..فان معظم لاعبي الهلال لم يصرفوا مرتباتهم وحوافزهم وبعضهم لم يستلم حتي مقابل تسجيلهم للهلال.

} نتمني ان يوفي المجلس حقوق اللاعبين وان يوفر مجلس ادارة نادي الهلال الاجواء والمناخ المناسب للاعبين وللجهاز الفني من اجل ان يبدعوا وان يقدموا ما لديهم من فن وابداع.

} يجب ان تحل ازمات اللاعبين ومشاكلهم حتي لو كان ذلك عبر الاستعانة بلجنة من خارج المجلس تشكل من اقطاب الهلال ورجاله خارج المجلس تكون قادرة علي ان تمنح لاعبي الهلال حقوقهم كاملة..دون العمل بالتقسيط والاقساط المملة في التسجيلات.

} نعم في الهلال رجال يجب ان يظهروا في هذا التوقيت لأن الهلال يحتاجهم الان..واظن ان الباب مفتوح الان لمعتز البرير والامين البرير والكاردينال وطه علي البشير وبابكر ود الجبل لدعم الهلال ولتخليصه علي الاقل من الديون التي اثقل بها كاهل الهلال.

} علي الاقل يجب ان يعطي لاعبو الهلال مرتباتهم وحوافزهم...فان فشل اولئك الاقطاب الكبار في حل مشاكل لاعبي الهلال (المادية) اعتقد ان جمهور الهلال قادر علي ان يدخل بعد ذلك ليدفع للاعبي الهلال حقوقهم حتي لو كان ذلك عبر التدافع بكثافة لمباريات الهلال ولتمارينه عبر فئة نقدية معينة يدعم بها لاعبي الهلال.

} لاعبو الهلال هم رأس الرمح وهم الذين يجب ان تكون هناك رعاية مادية كاملة لهم ..حتي يكونوا قادرين علي ان يقدموا مستويات ترضي جماهيرهم وتسعدهم.

} واضح ان لاعبي الهلال تحملوا الكثير في الفترة الماضية ..حتي انعكس السوء اخيرا علي اداء الفريق.

} مجلس ادارة نادي الهلال في الفترة الاخيرة كان بعيدا عن الهلال وبعيدا عن لاعبي الهلال..وكان من قبل صلاح ادريس رئيس النادي قريبا منهم ..لدرجة انه كان يعسكر معهم في الفنادق..ويدخل معهم المعسكرات المقفولة وقد انعكس ذلك ايجابا علي لاعبي الهلال.

} الان صلاح ادريس يبدو زاهدا في العمل في الهلال وان كان صلاح ادريس بعد الاحداث الاخيرة...يحاول ان يعلن عن وجوده في تمارين الفريق حضورا.

} لكن هذا لا يكفي.

} الهلال مقبل علي مباراة مهمة امام افريكا سبورت...والمخاوف تكبر ...والخروج يهدد الهلال من الخروج من البطولات الافريقية هذا العام ، رغم النتيجة الجيدة التي نجح الهلال بالخروج بها في المباراة الاولي التي لعبت في ساحل العاج.

} لا نقول صعب ان يحقق الهلال انتصارا علي افريكا سبورت والهلال يلعب في استاده...فهذا امر قد يكون ميسرا للهلال...لكن نقول يجب ان ندخل لهذه المباراة اكثر اصرارا واكثر قوة...لأن (المخاطر) تهدد الهلال وتحلق عليه.

} نريد ان ننفض الكسل الفني الذي ظهر علي الهلال في المباريات الماضية.

} نريد ان نتخلص من كل (مخاوفنا) ومن كل مشاكلنا بتقديم مباراة تعيد لنا الهلال الذي نعرفه.

} نبحث في هذه المباراة عن الثقة ...ونريد ان تطمئن قلوبنا.

} نعم هي مباراة للاطمئنان.

} مباراة للاعتذار...يرجع فيها هلالنا الذي غاب...ويهل من جديد.

} الاعتذار الذي نريده في هذه المباراة...ليس من قبل اللاعبين وحدهم.

} وانما الاعتذار الذي نريده في هذه المباراة...اولا من مجلس الادارة ..وذلك بحل مشاكل كل لاعبي الهلال ودفع كل استحقاقاتهم.

} كذلك نريد اعتذارا من الجهاز الفني ..وذلك بعودة عروض الهلال الممتعة والجميلة.

} لا نريد ان تكون المباراة مباراة انتصار والسلام ...نصعد بعدها لدور الـ 16 ونكتفي بشرف ذلك.

} ايضا هناك اعتذار ضروري ومهم ...نريده من (جمهور) الهلال الذي نسأله التدفق بشكل كبير وخاص والدخول لاستاد الهلال من اجل اعادة الثقة للاعبين وبث الرهبة والخوف والهلع في نفوس لاعبي الفريق الضيف.

} جمهور الهلال في الفترة الاخيرة كان بعيدا عن الهلال...او كانوا متفرجين لا غير.

} الشيء الذي يلفت للانتباه هو ان الهلال الي الان لم يعرف ان يستفيد من جمهوره...والهلال يملك اعظم جمهور في العالم.

} هذا الجمهور وحده يمكن ان يفعل الكثير...عبره يمكن ان نقول كلمتنا وعن طريقه يمكن ان نفوز بي اي بطولة يشارك فيها الهلال.

} في وجودي في القاهرة في الايام الاخيرة...تابعت مباريات للاهلي المصري وللزمالك المصري واعجبت بطريقة التشجيع والحماس الذي يمارسه الجمهور المصري.

} رغم العدد القليل الذي يشاهد المباراة من داخل الاستاد إلا ان الجمهور القليل الذي يدخل للاستاد يظل يشجع بصورة مستمرة طوال الـ 90 دقيقة..دون الالتفات لمجريات المباراة او حتي متابعتها.

} انهم يشجعون فقط....كأنهم خلقوا للقيام بهذه المهمة والسلام...تحس بذلك وهم يلوحون بالاعلام ويرفعون اصواتهم ويبذلون من الجهد ما لا يبذله حتي اللاعبين داخل الملعب.

} تحس ان شغلتهم في الدنيا (التشجيع)...لذلك فان الملعب يظل يغلي كالمرجل ..رغم ان اجزاء كبيرة من الاستاد خالية.

} نحن في السودان تمتليء استاداتنا ولا تجد حتي مقعدا او مكانا خاليا خاصة في مباريات الهلال والمريخ الافريقية، لكن مع ذلك فان صوت الجمهور لا تسمعه إلا قبل المباراة ، حتي اذا انطلقت المباراة...عاد الناس الي التحليل والتعليق ونسوا مهمتهم التي لا تقل باي حال من الاحوال من مهمة اللاعبين.

} في السودان نحن في الاستاد بنتونس....نخلي الكورة ونقعد نعلق...شيء نتكلم عن الاعلام وشيء عن التحكيم وشيء عن الانتخابات.

} والاغرب من كل هذا ربما تجد في الاستاد تفاصيل خاصة تحكي اثناء المباراة.

} عبدالله عاوز يعرس ..وعثمان اشتري ليه بيت...والامين بدل عربيتو.

} لكن غشوه.

} نحن نأتي للاستاد في غاية الاحترام والتهذيب..نتفرج ونشرب الشاي وناكل التسالي والترمس ونطلع.

} نقضي وقتا جميلا ونمشي.

} دورنا الاساسي لا نقوم به...ربما يترفع بعضنا من التشجيع...وربما مهمة البعض هي التحليل والانتقاد.

} الهلال يمتلك جمهورا يمكن ان يحدث هزة في الارض اذا شجع...ونمتلك مع هذا الجمهور حبا خرافيا للهلال...لماذا لا نستفيد من ذلك؟.

} لماذا نتابع المباراة كأننا نشاهدها في البيت او في النادي امام التلفزيون؟.

} روابط الهلال وتجمعاته يجب ان يكون لهم دور في وضع شكل مميز ومعين للجماهير في الملعب.

} التشجيع عندنا منحصر في افراد ويتم بمجهودات فردية من الصحاف وابوصفارة وغيرهم.

} لماذا لا يكون هناك تنظيم وعمل مدروس يظهر وجودنا ويطلع صوتنا؟.

} تعالوا نكون مع الهلال.

} ارفعوا صوتكم...انتم تشجعون اعظم فريق.

} شجعوا وسوف تجدوا الاثر واضحا في الملعب.

} مباراة الهلال امام افريكا سبورت...مباراة نريدها للجمهور.

} عاوزين نستمتع بي جمهور الهلال.

} وعاوزين نسجل اهداف الهلال من المدرجات.

} قولوا كلمتكم....الكورة في ملعبكم.

} ملحوظة: لا تنسي...انت هلالابي.

هوامش

} مقبرة الخصوم...ليها زمن بتفتش ليها عن (ضحية) تصرح وتتحدي.

} الضحية صرحت.

} يا جمهور قوم بالواجب.

} حسنا بي وجودك عزيزي المشجع.

} شجع انت في استاد الهلال.

} الاستاد يجب ان يكون بالزي الازرق الكامل.

} اعلام الهلال يجب ان ترفع في الاستاد...ويجب كذلك ان يكون هناك تجهيز لاعلام باحجام كبيرة ومميزة حتي تكون ظاهرة في الملعب وفي التلفزيون.

} في الاذاعة ذاتها عاوزينها تظهر.

} شجع ساعة الضغط علي الهلال...وساعة تراجع مستوي الهلال...وخلي صوتك هو الاعلي ..وما تنوم وقت الهلال يلعب.

} ناس افريكا سبورت...الجمهور براه ممكن (ياكلهم) اكل.

} انتوا ما عارفين جمهور الهلال.

} انتوا بتلعبوا...دي اسمها (المقبرة).

} تمرين الهلال في الغد...نريده ان يكون مناسبة خالصة لحب الهلال.

} يوم خالص لعشق الهلال.

} خبر عاجل: الضحية راحت فيها
a.nigoumi غير متواجد حالياً   رد مع اقتباس
قديم 04-13-2010, 11:57 PM   #6
a.nigoumi
:: منظمة نهضة شباب سنجه::
 
الصورة الرمزية a.nigoumi
 
تاريخ التسجيل: Feb 2010
المشاركات: 1,068
افتراضي

في واحد بحب الهلال شديد.

< حب مبالغ فيه.

< مثلو الاعلي في كرة القدم (مهند الطاهر).

< تمريرة هيثم مصطفي بتكسر فيه (ضلعة)....بقيل فيها وبتونس.

< قال التمريرة دي مفروض يعملوها في (العملة).

< التمريرة من فرحتو بيها (بتريح) بيها.

< شفتوا ليكم زول (بتريح) بي تمريرة.

< (كربنة) دا كان بعملها.

< اسمو كدا...عارفكم انا بتخلوا اي حاجة وتمسكوا لي في (الاسم).

< زي الزول البمشي يسأل من تقاطع المك نمر مع شارع البلدية..وقت يوصفوا ليهو التقاطع...بقول ليهم : هناك في مكتبة في التقاطع دا.

< كربنة دي الايامات دي معجب بي (ميسي).

< قال ميسي دا اي حاجة عملها في الكورة.

< حساب مثلثات..جبر...نحو ..قواعد...كيمياء ..علوم طبية...سياحة..سفارات.

< اي حاجة عملها.

< الشيء شنو تقول بالع ليه (سلبة)؟.

< بتعرفوا (السلبة).

< يعني روحو طويلة...ما زي الزول البكون (قافل) ومنتظر (الخمسين).

< تلقوه ضايق جنس ضيق. الجرة ما بنتظرها.

< كل مرة يقول للزول الجنبو...جر يا ود الناس.

< ميسي دا (مجموعة) بتاعة يايات.

< الشيء شنو؟.

< والله الواحد لو ما بكون مركز في الكورة تجيه (فقر) من الحركات.

< مفروض حركات ميسي دي يعملوا منها جرعة لمحاربة الملاريا.

< الناس لو بحثوا في الحتة دي ممكن يطلعوا بي (مركب) قادر علي اجتثاث الملاريا من القاع.

< بتعرفوا (الاجتثاث).

< نحن زمان وقت نكون عاوزين نقشر بنقول (اجتثاث).

< اجتثاث دي كانت عاجبانا شديد.

< عشان كدا كنا بندخلها ليك في اي حاجة.

< الواحد لو طلب ليه (سنتدوتش) فول...بقول لبتاع الفول...عليك لله اجتث لينا (الجبنة).

< يعني خلي الجبنة برة الفول. في ناس ما بحبوا اللخبطة.

< الجبنة بعملوها برة.

< البصلة برة. الزيت ذاتو بجيبوه في (كباية) برة الفول.

< نظام (فلسفة) وكدا.

< انتوا ما شفتوا الزول وقت يكون قادم من (العاصمة)...بحاول يتلفسف علي ناس الحلة.

< بقول ليهم : الزيت...خلوه لي برة..الفول بضربو سادة ...بس عليه حبة ملح.

< زي نظام...الشاي ..السكر خلوه لي برة. فلهمة ساكت.

< غايتو (ميسي) دا هسع بتفلهم بي الكورة جنس فلهمة.

< الكورة دي علي شوية (تتكلم) وهي في رجلو.

< بعمل بيها عمايل غريبة.

< مرة عندنا واحد شاف ميسي بعمل في الحاجات دي (بلع) النضارة حقتو.

< نظام انفعل. انفعل شديد.

< ومرة في واحد تاني طلع في (الصهريج) وقال لي ناس الحلة: يا جماعة ..صوتوا لي ميسي.

< اصواتكم دي اعطوه (ميسي).

< الحل في (ميسي).

< كربنة كان بحب الهلال وبفضل مهند الطاهر ومعجب بي ميسي.

< كربنة دا كان معجب بي (مهند الطاهر) اكتر من ميسي.

< اول حاجة عندو (مهند الطاهر) من ثم (ميسي).

< عشان كدا كربنة دي كان وقت يلقي ليه ناس بتكلموا عن (ميسي) طوالي بدخل ليهم بي (مهند الطاهر).

< بفرع ليهم بالهوبنة.

< ويقعد يتشهق. يتشهق تقول (طاحونة).

< مرة كربنة دا حاول يعمل ليهم فيها (فاهم) في الكورة..ومتابع اي حاجة.

< كربنة قال ليهم : والله ميسي الايامات دي ما فاضل ليه من مهند الطاهر إلا يقلب (الهوبة).

< الزول دا لو قلب الهوبة..ببقي (مهند الطاهر) عديل.

< قلت ليكم الزول دا احسن حاجة عندو في الدنيا (مهند الطاهر).

< ما بعرف حاجة في الدنيا دي غير مهند الطاهر.

< كربنة دا لو سألوه وقالوا ليه : عاصمة فرنسا شنو؟.

< بقول ليك : مهند الطاهر.

< كربنة دا مشي لي مركز الانتخابات وجاء راجع.

< قالوا ليه : انت صوّت لي منو؟.

< قال صوت لي مهند الطاهر.

< قالوا ليه: لكن مهند الطاهر ما نازل في الانتخابات.

< قال ليهم : نازل ..والدليل علي كدا ...موسي الزومة عامل معارضة في (الطرف الشمال).

< هسع يقول لينا اكرم الهادي سليم عندو (حصوة).

< نحن الحصوة كرهتنا بيها.

< نشفت ريقنا.

< ندمتنا علي قون سادومبا.

< اقول ليك حاجة يا اكرم. انت لعبت قدام (الغزالة).

< شايفنك ماخذ رأحتك علي الاخر.

< انت عارف بعد (الغزالة) ح تشوف شنو؟. ح تشوف (البعاتي).

< الترجي دا بعاتي عديل.

< انت يا طمبل تعال هنا...في الظروف الزي دي بتظهر مالك.

< اتخارج من بدري...ما تمسح تاريخك.

< يلموا فيكم ناس الترجي يعيدوا ليكم (سبعة) الوحدات.

< ونحن لو جابت ليها (سبعات) ما بنسكت.

< بنشيل حالكم.

< وانت يا طمبل برضو مننا وفينا. الضفر ما بطلع من الجلد.

< عشان كدا احسن اتخارج من بدري. اتصرف...ما تلعب المباراة دي.

< كلتشي اتخارج...انت البقعدك شنو؟.

< نحن اولادنا ديل ما بنقبل فيهم (سبعة).

< المشكلة قالوا ليك (تونس) في الحر دا (باردة).

< يعني (البرد) هناك بيلعب رأس حربة عديل.

< الشيء شنو؟.

< هسع يمشوا ويجوا ويقولوا لينا (السقط).

< احسن حاجة تدربوا علي (السقط) من الان.

< شغلوا المكيفات. ادخلوا التلاجات.

< عشان تدربوا وتفهموا حاجة.

< اتصرفوا.

< ما معقول كل سنة تقولوا لينا (البرد).

< ملحوظة: برد في عينك.

هوامش

< بالمناسبة ...ما نقوله للمريخ عن الترجي...نقوله للهلال عن الاسماعيلي.

< القمة تمر بظروف فنية بالغة في السوء.

< هسع عليكم الله لو ميسي دا براه لعب ضد الاسماعيلي ما بغلبوا ليكم.

< يعني في حراسة المرمي ميسي.

< في الدفاع ميسي وميسي وميسي وميسي.

< في الوسط ميسي وميسي وميسي وميسي.

< في الهجوم ميسي وميسي.

< اما احتياطي الفريق فهو يتكون من ميسي وميسي وميسي وميسي وميسي.

< بالتشكيلة دي الاسماعيلي ح يأخذ عشرة.

< قالوا صلاح ادريس بفكر يجيب ميسي للهلال في يونيو القادم.

< قلنا بفكر ساكت.

< كمان التفكير فيهو حاجة.

< وقالوا كمان المشكلة التي سوف تواجه ميسي في الهلال...هو ان ميسي ما في ليه خانة فاضية.

< انتوا جيبوا ميسي واشطبوا ليهو عشرة.

< راضين بالحكاية دي .. ما عندنا مشكلة.

< هسع تلقوا جمال الوالي صدق.

< قام عمل شنو؟.

< قام يعرقل (الخطوات) دي.

< التفكير ساكت بعرقلوا ليكم يا هلالاب.

< اصلو هو زول (عرقلة).

< عرقلة يا.

< الهلال لو جاب ميسي...جمال الوالي بعمل ليكم 10 طوابق.

< كل طابق فيه 4 مقصورات.

< عليكم الله هسع انتوا (المقصورة) في استادكم لزومها شنو؟.

< بتقعدوا في المقصورة عشان تتفرجوا في موسي الزومة.

< والسعودي بضيّع في الفرص.

< والنفطي.

< ما عندكم شغلة.

< النفطي دا تقول بيلعب في المريخ بالمراسلة.

< اسبوع في السودان وعشرة ايام برة البلد.

< هيثم المرابط...اكيد العرض دا بيعجبو.

< عرض زي دا في تونس ما بيلقاها.

< انتوا عارفين النفطي قاعد في تونس اكتر من هيثم المرابط المستقر هناك.

< خبر عاجل: النفطي دا لو بيلعب في الهلال كنا حولناه قسم (المدرجات).
a.nigoumi غير متواجد حالياً   رد مع اقتباس
قديم 04-15-2010, 01:31 PM   #7
a.nigoumi
:: منظمة نهضة شباب سنجه::
 
الصورة الرمزية a.nigoumi
 
تاريخ التسجيل: Feb 2010
المشاركات: 1,068
افتراضي

هذه الايام اقرأ لاعلام المريخ واضحك.

< فهم بكل استخفاف يريدوا ان يقنعونا ان (الترجي) فريق عادي....وفريق ضعيف..بحثا عن تثبيت قلوب لاعبي المريج الواجلة.

< قالوا ليك قريش برجف...متل السيرة البقولوا ليك ح نجي 23 شخصا فقط...(حافلة صغيرة).

< تفتح الباب تلقي العربات بدورحول البيت زي القطر.

< الخلق دي...شيء تعرف..وشيء ما تعرف.

< اخر قياس لرجفة اكرم الهادي سليم يقال انها وصلت لحد الهزة الارضية.

< انتوا بتغشوا في منو؟.

< بتغشوا فينا..وإلا في نفسكم.

< الجماعة كلهم مدورون علي ان الترجي فريق ضعيف ويمكن للمريخ ان يتجاوزه.

< بالله. ما بصدق.

< انتوا الشافكم...بتلعبوا مع الامل في الكونفدرالية ما كذب.

< بالمناسبة نحن الامل سوف نلعب معه في الممتاز في الايام القادمة.

< لكن انتوا ح تلعبوا معاه في (الكونفدرالية).

< شغلكم دا شغل (كونفدرالية)...ما شغل بودي لي قدام.

< اتقونعوا ساكت من بطولة الاندية الافريقية للابطال.

< مستواكم دا في الكونفدرالية ان ما لقيتوا ليكم لكزة...لكزتين من (الحكام) ما بتمشوا لي قدام.

< اللكزة في الكورة يعني احتساب (ضربة جزاء)...لكزتين..ضربةجزاء وحالة طرد.

< كتابة اعلام المريخ عن الترجي وعن تهوين الامر للاعبي المريخ وجمهور المريخ بتذكرني بالحكاية دي.

< زمان عندنا واحد طلع فيه (قطر)...خلاه متل (سلطة الاسود)...مهروس هريسة.

< حالتو كانت صعبة شديد. لكن نحن طبعا ناس منطق ساكت.

< اقنعنا ليك الزول الضاربو القطر دا..وقلنا ليه : يا زول الحبة ما عندك.

< دا (رديخ) ساكت. زولكم اربعين يوم عينو ما لاقت...ما شاف النوم.

< لكن نحن بتوع منطق...اي زول بنقنعوا ليك.

< الديك ذاتو بنقنعوا ليك. خلف الله بنقنعوا!!.

< قلنا ليه : الموضوع بسيط...انت ما عندك أي حاجة.

< بعدين النوم عاوز بيه شنو؟. دا زمن ينوموا فيه.

< والله عندنا واحد نام خمس دقائق فقط...لقي اولادو باعوا البيت والحواشة والعربية. الواحد ما ينوم يعني.

< زولكم الضاربو القطر دا ..قدر ما اتوجع...قدر ما اشتكي...اقنعناه ليك...قلنا ليه دي رطوبة ساكت...انت ما عندك أي حاجة.

< طبعا الايامات دي في موضة رطوبة. أي زول يشكي بقولوا ليه دي (رطوبة).

< والجو ذاتو بقي ما مفهوم...مرة سخانة ومرة برد. المهم الزول الضاربو القطر ...حالتو اتأخرت شديد..

< بعد 4 شهور من تاريخ الحادث...قررنا نحن بتوع المنطق نودي الزول دا للدكتور. واقول ليكم حاجة للامانة. في الـ 4 شهور دي ما خلينا ليه حاجة.

< شيء حلبة..وشيء حرجل ..وشيء نعناع.

< نحن في الحاجات الزي دي ما بنقصر...الحاجات دي نحن طالعين ليها.

< انا ما عارف دخل (الحلبة) بالنعناع شنو؟. شلنا الزول وجري علي الدكتور.

< جري بعد 4 شهور انت بتلعب علينا.

< الدكتور عاين للحالة...لقاها متأخرة شديد...قال لينا : الحادث كان متين؟.

< قلنا ليه قبل 4 شهور؟.

< الدكتور قال لينا طيب جايبنو هسع ليه؟...عاوزني (احمضو) ليكم...شيلوا زولكم دا وانتظروا (قدر الله) ساكت.

< ناس المريخ هسع منتظرين (قدر الله). انتوا حالتكم دي متأخرة شديد.

< قالوا الترجي فريق عادي. صدقناكم.

< عادي ...عادي...نحن مالنا. بس البقنع اكرم الهادي سليم شنو؟.

< ولو اكرم اقتنع...البقنع موسي الزومة شنو؟.

< والله موسي الزومة دا ...(قطر) ما يقنعوا ليكم.

< مريخابي واقعي شديد. من عرف ان المريخ ح يلعب مع الترجي...عرج علي (الكونفدرالية). بقي متابع الكونفدرالية.

< المريخابي مسكين...من تجيب ليه سيرة الترجي يقعد يرجف متل اربعة الشيرية.

< عليك الله هسع اربعة الشيرية بترجف.

< المريخابي حيران..قال لي : هسع انا اعمل شنو؟.

< قلت ليه اقفل الموبايل.

< قال لي والله الهلالاب ديل لو قفلت الموبايل (المسكول) حقهم يصلك.

< قلت ليه بعد ما تقفل الموبايل ...طلع (البطارية).

< المريخابي مشي قفل الموبايل ..وطلع البطارية.

< لكن الهلالابي (حريف)...ضرب ليه في تلفون زوجتو...وقال ليه: انت مالك قافل التلفون الليلة من الصباح.

< المريخابي بقي يقفل تلفونو ..وتلفون زوجتو.

< لكن الهلالابي كان احرف...ضرب ليه في تلفون ولدو.

< المريخابي ما بتلفت...قفل تلفونو وتلفون زوجتو وتلفون ولدو.

< الهلالابي طلع شفت ضرب ليه في تلفون الجيران.

< المريخابي اليوم الثاني قفل تلفونو وتلفون زوجتو وتلفون ولدو وتلفون الجيران.

< المهم بعد شهر...الحلة كلها قفلت تلفوناتها.

< لكن الهلالابي (مفتح).

< عارفين ...عمل شنو؟. ضرب ثلاث تسعات.

< مريخابي تاني...قال لي : مباراة الترجي كيف؟...انا خايف منها شديد.

< تصدق مشيت لي طبيب الاسنان عشر مرات.

< قلت ليه طبيب الاسنان ذنبو شنو؟.

< مرضك دا...ما مرض (اسنان)...دا مرض كبر.

< والله نحن نلقي (حكامكم) ديل مع (برشلونة) نلعب.

< ما سايلين في مانشيستر.

< انتوا بتتكلموا كيف؟.

< واحد تاني حاول يعمل فيها ظريف...قال لي الجماعة ديل لو ركزوا ممكن يغلبوا (الترجي).

< قلت ليه : ناس طمبل واكرم ديل ..لو بركزوا ما بيلعبوا في المريخ.

< المريخابي ما عرف يشمي وين؟.

< زولكم بقي زي حبة الفاصوليا.

< ما عاوز اقول ليكم بقي زي (السمسمة) عشان حجمو كان كبير شوية.

< مريخابي خامس ..او سادس...مريخابي (وصيف) المهم..قال لي عاوز انسي.

< قلت ليه : عاوز تنسي شنو يا خلف الله؟.

< افتكرتوا يقول لي (الترجي)...قال لي حاجة تانية.

< عارفين قال لي شنو؟. قال لي عاوز انسي اني (مريخابي).

< قلت ليه : للدرجة دي. قال لي : عشان ما نلاقي الترجي.

< عاد الترجي دا بتمشوا منو وين؟..القال ليكم منو؟...اتجاوزوا (الغزالة).

< الغزالة بتجاوزه. انتوا بتتكلموا كيف؟.

< الغزالة شرك. عشان تاني ما تتشابروا ساكت.

< واحد تاني ..قال لي تعرف...الترجي دا ضعيف السنة دي.

< قلت ليه فعلا يا (خلف الله)... الترجي حارسو شعيرية...لو فكيت ليه (كلمات متقاطعة) حرف ما بمسكو.

< لو فكيت ليه (جوكر) ما بنزل. ودفاعو ذاتو (فتة).

< وما عندو(وسط). وهجومي سلبي زي اعلام المريخ.

< المريخابي اتبسط في الدنيا دي جنس انبساط.

< بقي يضحك زي (الابريق) الرايح...وقال لي : تعرف انت بتقول الحقيقة.

< انت زول تمام. خلي فريقو وقعد يشكر فينا.

< قلت ليه تعرف ...الترجي دا فيه 90 مشكلة.

< قال لي قول لي اربعة...ريحني ..خلينا اشم الهوا ...واشوف النوم...قول ينصر دينك. قلت ليه اول حاجة...الترجي التلاتة ما بتوقفو...الترجي من سبعة ولي فوق.

< قال لي : وتاني.

< قلت ليه : تاني حاجة...الترجي دا عندو جمهور متل (كمسنجية) الميناء البري ..ما بقعدوا. ثالث حاجة ناس الترجي ديل برة بلدهم عندهم.. زي جوة بلدهم.

< المريخابي قبل ما اقول ليه المشكلة الرابعة (اتراوح)وقال لي : المشاكل ما عندهم.

< ملحوظة: لو قلتوا ليكم باقي المشاكل...ما في زول بقعد منكم.

هوامش

< كل التعازي للاستاذ رمضان احمد السيد في رحيل والده ولكافة الاسرة في فقدهم الجلل (احمد السيد)..نسأل الله ان يتقبله قبولا حسنا وان يلزم اهله وذويه الصبر والسلوان.

< فريق الترجي في المباراة التي لعبها بالامس امام شبيبة القيروان فاز 3-1...وقدم مباراة كبيرة وقوية.

< يا اكرم ركز في (الحصوة).

< طمبل رجع تاني يشكي من (الركبة).

< بالمناسبة سوف نكتب مقال عن هيثم طمبل ليعود الي الهلال ليختتم مشواره الكوري مع زملاء دربه في الهلال ..مثلما فعل الريح مصطفي وكما فعل النقر.

< طمبل (متين العودة تاني).

< هذا المستوي الذي يلعب به الترجي...المريخ لا يستطيع ان يجاريه.

< الشاف (السبعة) اتكررت ما كذب.

< ح تسوبعوا فينا...جنس تسوبع.

< شوفوا كونفدراليتكم وين؟.

< خسارة الهلال امام الاهلي..شيء طبيعي جدا..في ظل الفوضي التي يعاني منها الهلال هذه الايام.

< الهلال يعاني من عدم الاستقرار الفني.

< قولوا لي ناس المعز..لو ما لعبتوا كويس بنلعبكم مع المريخ والامل في الكونفدرالية.

< انتوا قولوا ليهم : الكونفدرالية...واسكتوا علي كدا.

< الهلال بالتخطيط الجماهيري الرهيب...يمكن ان يتجاوز (الاسماعيلي).

< يجب ان ينتصر الهلال علي الاسماعيلي باكثر من ثلاثية حتي يضمن التأهل وحتي يحسم امر تأهله للمجموعات من ام درمان.

< احسموها في ام درمان.

< تذكروا ان عصام الحضري يلعب في صفوف الاسماعيلي.

< عندنا باقي حساب مع الحضري.

< نحن ما بنخلي حقنا. عيدوا لينا الثلاثية.

< الكلام دا واضح. لا بد من اعادة تطبيق العقوبة في الحضري.

< تلتوها.

< خبر عاجل: وخليك في استاد الهلال.
a.nigoumi غير متواجد حالياً   رد مع اقتباس
قديم 04-21-2010, 05:01 PM   #8
a.nigoumi
:: منظمة نهضة شباب سنجه::
 
الصورة الرمزية a.nigoumi
 
تاريخ التسجيل: Feb 2010
المشاركات: 1,068
افتراضي

قال ليه : (كسير التلج) بالانجليزي كيف؟.

< انت عايش وين؟...ما عارف (كسير التلج بالانجليزي).

< البلد دي كلها بقت (كسير). يا تكسر تلج...يا كسروك.

< عالم شغلتها بس يكسروا (مواهب)..ويكسروا (ثلج).

< عشان كدا..احسن حل...تكسر (تلج)...تمرق بي (ركبك).

< عمكم كبير...عندو (نضارة) من زمن أي بيت في السودان قدامو (صانفور خارجي).

< زمان كانت في موضة (صانفور السكة الحديد).

< أي زول يقول ليك..بيتنا قدام الصانفور الخارجي.

< تقول (الصانفور) حاجة سمحة..عشان يوصفوا بيهو.

< المهم عمكم دا كان ما بشوف.

< عمكم دا كان بقعد في الكورة...يتفرج شوية...ويقول بعد ربع ساعة من المباراة:

< والله انا لو ما ركبي ديل كعبة..كنت بلعب احسن من ناس كلتشي.

< هسع كلتشي دا عندو كورة...ما شايف ليه حاجة..غير (التشويح).

< تقول (عطشجي). بتعرفوا العطشجي.

< يا حاج والله انت لو ركبوا ليك (ركب) ميسي..ما ترفع ليك كورة.

< ركب شنو يا حاج؟..انت (الفرجة) لو كترت عليك..نفسك بقوم.

< بتقطع عديل.

< بتبقي زي سيد الترمس ..البلف الواطة دي كلها في النهاية يلقي ليه شافع يوقفو...يقول ليه : يا حاج الساعة كم؟.

< الساعة كم؟...شايفني ببيع (ثواني).

< ولاد اخر زمن...اهلكم ما ربوكم.

< عمك كبير..وقال لو ما (الركب) كان ما سأل في (كلتشي).

< زول خشمو كلو..ما فيه (سن)..سهلة ساكت.

< متل سلة المهملات...الما فيها (مهملات). متل (حواشات) مشروع الجزيرة.

< متل سلك الغسيل الما فيه (غسيل). متل (القدرة) البنزلوها من تسعة من النار.

< نظام ما في (فول). فول في عينك.

< ارجع ليكم..لموضوع (كسير الثلج).

< ما تطلعونا من الموضوع.

< كسير التلج بالانجليزي يعني ...تمشي لي زول...يعزمك (فول).تقعد تشكر ليه في الفول.

< تخلي الدنيا كلها وتقبل علي (الفول).

< الفول يكون (ملح) ما فيه...شينة والله تقعد تشكر فيه.

< فول مسيخ..ما بتبلع. تطلع الفول ..زي (السمك).

< يا جماعة دا (كسير) شنو الوقعنا فيه دا؟

< دا كسير تلج بالانجليزي.

< زول يحكي ليه (نكتة) بايخة...تقعد تضحك ..لما (الضحك) يشرطك.

< دا كسير تلج (انجليزي).

< والله..وانت زول خطير..وانت..وانت...وانت ما بتستاهل!!.

< تخلي (النكتة)..وتمسك في (الزول).

< قميصك ظريف...حلاقتك عجيبة.

< كل مرة تعرج علي حاجة.

< كسير التلج كدا.

< زي الزول المشي ليه لي دكتور ..يشكي من (المصران).

< حالتو صعبة شديد. ما قادر يقول حاجة.

< الدنيا مضلمة في وشيهو..زي استاد المريخ يوم اتغلب فيه المريخ اربعة.

< يا دكتور ..انا تعبان شديد...ما قادر اخذ نفسي.

< الوجع وين يا حاج؟...اصبر..ان شاءالله ح تبقي كويس.

< يا دكتور انا ما قادر انوم...(الموية) دي مسخت عليّ.

< الدكتور بسأل فيه كدا...غلط جاب سيرة الكورة.

< الترجي والمريخ.

< عمك نسي (المصران) حقو...وفتح في (الترجي). هو الترجي عندو كورة. هو الترجي دا فريق. كلو من اعلام الهلال...عملوا منو (بعبع).

< عملوه لينا (فريق).

< طمبل اتصاب. وسفاري ذاتو جاه (صداع).

< الحاجات دي كلها من ناس الهلال.

< بي غادي الحضري يتصاب..وبي هنا سفاري وكلتشي والزومة وطمبل.

< هسع دي ما حقارة.

< يا حاج انت قلت لي الوجع وين؟. الوجع في (الترجي) يا دكتور.

< يعني ما من (المصران).

< مصران شنو؟...يمين انا باكل (الزلط).

< باكل الحجر...لكن بي صراحة يا دكتور ..من عرفت المريخ ح يقابل الترجي...صحتي اتدهورت.

< بقيت ما بنوم...والموية مسخت لي. الترجي دا نحن ما عندنا ليه قدرة.

< يا ريت (الغزالة) لو اكلتنا. يا ريتها لو قطعتنا.

< هسع ناس المريخ ديل فيهم زول واعي.

< فيهم زول مسؤول كدا. معقولة تسافروا للترجي في بلدو.

< وبي منو؟. بي ناس اكرم ونجم الدين.

< انتوا يا جماعة ماشين تعملوا ليكم ندوة.

< ماشيين تجيبوا ليكم (تبرع). يا حاج انت ما قلت (المصران).

< مصران شنو يا دكتور ...خلينا اتكلم...خلينا (افضفض) شوية.

< انا المصران ما تاعبني ...لكن تاعبني البعمل فيه (كاربوني) دا.

< تصور يا دكتور بقيت الايام دي بحلم بي (الوحدات).

< السبعات دي تجي وتفوت فيني.

< الله يكضب الشينة.

< خلاص قوم يا حاج..تعال لي بعد الكورة. انا بعد الكورة ..ما بجيك...ما بظن اكون كويس.

< انا خلاص ايامي محدودة في الحياة. زول يلاقي (الترجي) في الظروف دي.

< ما سمعتوا بـ (البرد). ما سمعتوا بـ (المطر).

< يا ناس الامل ..ان شاء الله تثبتوا في الكونفدرالية...عشان ح يجيكم (رفيق).

< انتوا شفتوا البعمل فيه ناس المريخ الايامات دي.

< الجماعة بقوا يكسروا تلج لي ناس الامل.

< قالوا ليك ناس المريخ عندهم (رابطة) مسافرة عطبرة عشان تشجع الامل.

< عارفين كسير التلج دا في شنو؟.

< كسير التلج دا لي مصلحة.

< الجماعة عاوزين بعد ما يطيروا من بطولة الاندية الافريقية للابطال..يمشوا يلاقوا الامل.

< انتوا القال ليكم ح تلاقوا الامل منو لو نزلتوا للكونفدرالية؟.

< قالوا العلاقات الايامات دي قوية بين المريخ والامل.

< عشان كدا الامل بقي في اخر روليت الدوري الممتاز.

< يا ناس الامل لو ما خربتو علاقتكم مع المريخ ما بتمشوا لي قدام.

< كسير التلج دا بنزلكم للدرجة الاولي ..اعملوا حسابكم.

< ملحوظة:نحن ناقصين كسير تلج.

هوامش

< تصريحات الاسماعيلي وتهورات ادارته ما كعبة معانا.

< كل ما التصريحات تكون مستفزة ..كل ما تكون (الاهداف) كتيرة.

< زمان كان بمرقكم (كلتشي) يا ناس الاسماعيلي..هسع كلتشي ما في.

< اقل من ثلاثة ما بتمرقوا مننا.

< كامبوس اشاد بي خليفة واشاد بي التاج.

< والله ما قصر معاكم.

< جمهور الهلال ينتظر من هيثم مصطفي حفظه الله ورعاه الكثير في مباراة الهلال والاسماعيلي.

< الاسماعيلي واضح انه سوف يلعب المباراة امام الهلال في ام درمان من اجل استفزاز لاعبي الهلال.

< هذه الاستفزازات القضاء عليه سوف يكون عبر المساندة والتشجيع القوي من قبل جمهور الهلال.

< جماهير الهلال قادرة علي القضاء علي كل حيل لاعبي الاسماعيلي..وعلي كل تخطيطات مجلس ادارتهم وجهازهم الفني.

< مباراة الهلال القادمة مباراة (الجمهور).

< العبوها (جماهيرية).

< يبدع لاعبو الهلال عندما تغني المدرجات.

< سعادة الهلال وانتصاره في المدرجات.

< كاربوني اضاف كلتشي للكشف الذي غادر لتونس.

< ثقة ما في.

< انت وقت بتسوق الزول المصاب...طمبل دا مالو.

< الزومة ذاتو مالو؟.

< انا ما عارف موسي الزومة دا اتصاب وين؟.

< الجماعة عاوزين يتخارجوا.

< السعودي براه ما بعمل حاجة.

< في تونس سوف يلعب المريخ بالسعودي وبالتونسي.

< السبعة واقعة.

< اتستروا بس في اول ربع ساعة.

< اثبتوا لينا.

< ما تفضحونا...ما تمشوا تساكفوا لينا في تونس.

< نحن ان شاءالله ح نرفع رأسكم في ام درمان.

< ناس سادومبا دا شيء تشوف..وشيء ما تشوف.

< غايتو الحضري دا بفهم حاجة.

< لكن بالجد ح نفقد مهند الطاهر.

< مهند الطاهر طبعا متخصص في الاندية المصرية.

< سجل في حرس الحدود وسجل في الزمالك.

< والاهلي طلع منه بالرقراق.

< ما مشكلة مباراة الاياب..مهند عندو كلام.

< خلينا (الهوبة) للاسماعيلية.

< صداع سفاري قالوا سببوا (العياري).

< ليه حق سفاري يشكي من (الصداع).

< دفاع المريخ عاوز يصفي علي ناس (نجم الدين).

< ليبيا فتحت.

< ركبوا التونسية.

< غايتو انتوا يا الهلالاب بتتفاصحوا ساكت.

< بتموها كلام جرايد بس.

< خبر عاجل: برضو دا ما بمرقكم من السبعة.
a.nigoumi غير متواجد حالياً   رد مع اقتباس
قديم 04-24-2010, 03:44 PM   #9
a.nigoumi
:: منظمة نهضة شباب سنجه::
 
الصورة الرمزية a.nigoumi
 
تاريخ التسجيل: Feb 2010
المشاركات: 1,068
افتراضي

ذكرت (الحضري).

} فتذكرت هذه القصة.

} (اصيب هنري بارنز المسئول عن حركة المرور في مدينة نيويورك بنوبة قلبية...وبينما كان رجال البوليس يعطونه أوكسجين الطوارئ قال:

-انني ارقد علي باب الموت..وهم يحاولون ان يدفعوني من خلاله ، ولكنهم لا يقولون من أي طريق).

} والحضري البعض يدفعه في نفس الطريق.

} ولا يقولون له (من أي طريق).

} انا لا اعرف هنري بارنز.

} وانتم لا تعرفون هنري بارنز.

} لكننا جميعنا نعرف (الحضري).

} سوف اذكركم.

} الدرس الاول.

} الكرنقة..(الاصابة داخل الخط علي مسئولية قذيفته).

} تذكروا عندما اطلق كرنقو (صاروخ) من عينة (11 سبتمبر).

} البلد كلها قعدت تتلفت.

} الصاروخ دا طلع من وين؟.

} عملنا مشكلة في النت ومشكلة في المواصلات ..ومشكلة في السكر.

} المنتديات دي كلها دورت.

} حسن المستكاوي في مصر الي الان بحلل في (صاروخ) كرنقو.

} قال انطلق من (الخرطوم) واصاب ضحيته في (اسوان).

} والناس تتلفت.

} (الله يجازي محنك يا كرنقو).

} مسكين الحضري بعد هذا الصاروخ...قال ما بقعد في البلد.

} قالوا ليه بتمشي وين؟.

} قال : ماشي سويسرا...زولكم طلع من مصر وخلي الاهلي.

} قال ماشي يقرأ.

} الحضري ما اشتغل بي عقدو مع الاهلي ...سافر سويسرا (هربا).

} عدلي القيعي بقي كل خمس دقائق ينط ليه في فضائية.

} نحن ما بنسكت ..نحن ح نمشي لوزان.

} ونحن ونحن.

} عدلي القيعي بقي زي ناس نيل الحصاحيصا.

} والقيعي ما عارف السبب (كرنقو).

} كرنقو عملها ومشي مدني ...ولا عليه.

} اها يا الحضري عارف نحن جبنا لينا واحد اسمو (سادومبا) شيء تشوف وشيء ما تشوف.

} ساومبا دا ..الحارس قبل ما يسجل فيه ..بقطعوا (السلطة).

} وبخليه يملأ الجركانات موية.

} الدرس الثاني.

} الكرنقة..الحذر ما بحمي من القدر.

} الثلاثية التي انزلها الهلال عقابا علي الاهلي المصري يفترض ان ينزلها في الغد عقابا علي عصام الحضري.

} اوعكم تنسوا العملوا فيكم عصام الحضري.

} عصام الحضري ..الاهلي غلب الهلال في مصر قعد يرقص.

} قلنا ليه: اصبر بتجي السودان وبتفهم حاجة.

} صاحبكم ما عارف (الرقيص) عندنا عيب.

} الرقيص دا نحن (بنتوبت) فيه عديل.

} (صريناها) ليه ..قلنا بجي ام درمان.

} الحضري مع الرقيص بقي (يصرح).

} ما عارف نحن (التصريحات) دي بنحاسب عليها حساب عسير.

} بالورقة والقلم.

} لما تكون عندنا كورة بندخل (النت) نرصد أي تصريح.

} المدرب قال شنو؟.

} رئيس النادي رأيو شنو؟.

} ما بنفوت أي حاجة.

} أي زول صرح ...لاعب ..مدرب ..ادري ..جندلناه في (المقبرة).

} ما بنفوت حاجة.

} وما بنخلي حقنا.

} الحضري صرح وجاء ام درمان.

} امانة ما وقع (حارس).

} ناس كرنقو ديل عملوا فيه جنس عمايل..الحضري ما فهم أي حاجة.

} المباراة كلها يقطع.

} شيء بالرأس وشيء من منتصف الملعب ..وشيء يمين وشيء شمال.

} زولكم ما فهم أي حاجة.

} والمدرجات تعجبك..بتشجع تشجيع.

} ناس الهلال دخلوا الكورة شايلن (التابوت).

} الناس ديل بياكلو (الزلط).

} ما في حاجة بتقيف قدامهم.

} ما عندهم قشة مرة.

} الحضري اضرب ثلاث زي الما حصل حاجة وطلع.

} طوالي قال ماشي (سويسرا).

} انتوا عارفين الحضري مشي سويسرا ليه؟.

} عشان ناس الزمالك قالوا ليه : نحن ح نجيب (كرنقو).

} قام كرنقو بدل ما يمشي القاهرة مشي الحصاحيصا.

} الحضري بعد سنة جاء راجع تاني مع المنتخب.

} افتكرنا نسينا (التصريحات) والرقيص الكان بعمل فيه في القاهرة.

} عارفين انضرب كم مع المنتخب؟.

} انضرب اربعة.

} المرة دي الحضري جاكم مع الاسماعيلي.

} ونحن برضو ما بنغفرها ليك.

} تجينا مع المنتخب ...تجينا مع الاهلي مع الاسماعيلي ..بنوقع ليك الكلام ونضربك زي الما حصلت حاجة.

} عامل فيها (حريف).

} ناس سيدا ديل ما بنسوك..وما بفوتوا ليك حاجة.

} لكن المرة دي ..(الحضري) جاء مهذب...في غاية الادب.

} الظاهر في زول قال ليه : ما تصرح...الجماعة ديل شفوت.

} ظاهر كدا ...في زول قعد معاه.

} في زول فهمو.

} زولكم جاء مسكين.

} الرقيص خلاه.

} انا بشك في (عشاء) القاهرة.

} في زول ملأ ليه رأسو...قال ليه الجماعة ديل ما تستفزهم.

} قال ليه ما تصرح...ما تقول أي حاجة.

} اعمل فيها ما فاهم أي حاجة.

} عشان كدا الحضري ساكت.

} التمرين رفض يمشي عليه.

} لكن يا الحضري عاوزك تفهم حاجة واحدة.

} نحن الثلاثة بنديك ليها.

} تصرح ..ما تصرح ..دي ما مشكلتنا.

} ترقص ..ما ترقص ...برضو ما بنخليك.

} تجي مع الاهلي ..تجي مع المنتخب..تجي مع الاسماعيلي...ما بنخليك.

} نحن المرة دي عقابك بكون عندنا اكبر.

} انت القعدك تفاوض في ناس المريخ شنو؟.

} موضوع مفاوضتك مع المريخ عندنا اسوأ من تصريحاتك.

} اسوأ من رقيصك.

} والعشاء الاتعشيتو مع جمال الوالي ما بنفوتو ليك.

} انت القال ليك اتعشي منو؟.

} نحن في حاجات ما بنجامل فيه.

} اول حاجة التصريحات.

} تاني حاجة الرقيص.

} ثالث حاجة العشاء مع جمال الوالي.

} ممكن نسامحك في التصريحات.

} وممكن نسامحك في الرقيص.

} لكن العشاء دا ما بنسامحك فيه.

} نحن لو سامحناك ...(سادومبا) ما بسامح في حاجة زي دي.

} وامبيلي لو عرف المعلومة دي ..وعرف انك اتعشيت مع جمال الوالي بشهيك العافية.

} بتبقي زي اكرم الهادي سليم ..السنة كلها يشكي من (الحصوة).

} ملحوظة: الضحية (اتحضرت).

هوامش

} اكرم دا امس رجع تاني يشكي من (الحصوة).

} الحصوة ظاهرة في شبكتو.

} الجماعة اخذوا تلاتة في نص ساعة.

} الحصة زمنها 45 دقيقة.

} دا شغل العناية المكثفة.

} سفاري خسر الترجي (طقم) فنايل كامل.

} كلموا ناس الترجي لما يجوا الخرطوم أي لاعب يجيب ليه معاه 40 فانلة.

} الظروف ما معروفة.

} سفاري دا الظاهر عليه بركز في (الفانلة).

} غايتو يا سفاري (سادومبا) دا علمكم طبع شين.

} بقيتوا تشيلوا وتقطعوا في (الفنايل).

} وارغو الي الان فاقد (ذاكرة) التهديف.

} الزول دا مالو.

} المريخ بالاخضر ..كنت فاكرو (نيل الحصاحيصا).

} قلت بيني وبين نفسي...النيل دا الوداهو يلعب مع الترجي شنو؟.

} وفي تونس كمان.

} سمح الصدف.

} لكن وارغو دا ناس المريخ شطبوه متين؟.

} قلت ليكم كنت فاكر المريخ (نيل الحصياحيصا).

} تووووف جاء قون.

} قلت ما غريبة علي النيل.

} شوية كدا شفت كاربوني.

} معقولة ...كاربوني بقي يدرب فريق النيل.

} الحصل شنو يا جماعة.

} يعني الواحد ما ينوم.

} لكن ناس النيل ديل مالهم كورتهم بقت (ملخبطة) كدا.

} كاروسكا دا من شفت بيلعب في المريخ ..قلت مفروض يلعب في النيل.

} لكن ما معقول.

} اكرم الهادي سليم برضو بقي يلعب في النيل.

} يكون لحق (بهاء الدين).

} قلت ليكم كنت فاكر المريخ (النيل).

} توووف القون التاني جاء.

} قلت ما غريبة علي (النيل).

} يعني معقولة النيل يثبت امام الترجي.

} دا شنو دا...شفت لاسانا.

} ناس النيل ديل مالهم بقوا كلهم من المريخ.

} ما غريبة.

} اصلهم من يومهم تابعين للمريخ.

} قلت ليكم كنت فاكر المريخ هو (النيل).

} لابسين اخضر ...والمستوي واحد.

} توووف القون الثالث جاء.

} برضو ما غريبة.

} اصلو ناس النيل دا مستواهم.

} طلعت وجيت...لقيت ليك كمال حامد بحلل في الشوط الاول.

} الرشيد المهدية قال فريق المريخ عمل وعمل وعمل.

} قلت الرشيد بكون غلطان..اصلو طوالي بغلط.

} يكون قاصد النيل.

} الشوط التاني بدأ.

} ما اشتغلت بيه.

} اخر الدقائق كدا شفت ليك العجب.

} قلت دا ما بكون العجب...العجب البوديهو يلعب في النيل شنو؟.

} العجب دخل.

} قلت يكون شطبوه مع امير دامر.

} ما في حاجة بعيدة علي ناس المريخ.

} قلت ليكم كنت فاكر المريخ ...النيل الحصاحيصا.

} طلعت بعد المباراة ..لقيت ليك اتنين بتونسوا ..دي ما كورة ..ومعقولة يعني نغلب الترجي اربعة..وجمال الوالي دا ذاتو ليه ما سافر مع الفريق.

} قلت ناس النيل ديل متين عملوا ليهم (صفوة).

} قادر الله.

} لقيت ليك اتنين بتخابطوا...وجابوا سيرة الطابق التاني.

} قلت الشغل دا شغل صفوة عديل...ناس النيل عملوا ليهم طابق تاني.

} ضربت تلفون لي واحد صاحبي ..قلت ليه : انت تعال هنا الكان لاعب ضد الترجي منو ؟..المريخ وإلا نيل الحصاحيصا؟.

} الزول الضربت ليه قال لي : لا المريخ لا النيل ...دي جزيرة الفيل.

} قفلت علي كدا.

} خبر عاجل: غايتو يا ناس جزيرة الفيل فضحتونا فضيحة.
a.nigoumi غير متواجد حالياً   رد مع اقتباس
قديم 05-04-2010, 06:21 PM   #10
a.nigoumi
:: منظمة نهضة شباب سنجه::
 
الصورة الرمزية a.nigoumi
 
تاريخ التسجيل: Feb 2010
المشاركات: 1,068
افتراضي

< لو كنت عاوز ليك (قروش) من زول ...كل يوم بتمشي ليه في البيت.

< عينك قوية طبعا.

< تطلع بعد الشاي ..ما تطلع بي حاجة.

< تطلع قبل الشاي...برضو ما تطلع بي حاجة.

< قبل ما تشرق بتمشي عليه ...عشان بتخاف يطلع.

< نظام الولد عامل فيها (حريف).

< الزول البتمشي ليه دا عشان تشيل منو القروش...كل يوم بقول ليك حصلت لي ظروف.

< ويقعد يتعذر ليك..انت يا ود الناس (الاعذار) دي بتجيبها من وين؟.

< ماسورة واتكسرت.

< ببكي ليك في الدنيا دي جنس بكي.

< يندمك علي (الساعة) اللابسها.

< الساعة هسع ذنبها شنو؟.

< عشان تدخلها لينا في الحتة الصعبة دي.

< لكن الزول العاوز منو قروش. ..بعملها ليك كلها في (الظروف).

< ظروف شنو يا ود الناس....يعني انت ولدوك في سبعة.

< معليش بس..اديني 24 ساعة...بجيب ليك القروش لي عندك.

< بوصلها ليك في البيت...ولو لقيتك ما في ..بسلمها ليك (المدام).

< اوعك تغلط...لو لقيتني ما في احسن ترجع بيها ..من تسلمها لي المدام.

< علي الاقل القروش وهي عندك بكون في (امل).

< الهلال والمريخ الاتنين اتجهجهوا.

< زولكم يقعد يتعذر ....متل (سيد الضرس).

< يكرهك (طير الرهو).

< طير الرهو هسع ذنبو شنو؟.

< بكرة تمشي ليه ...من صباح الرحمن.

< تاني يقعد يعتذر ليك.

< يغني ليك في الدنيا دي جنس غنا.

< يكرهك (الملوخية) الضربتها قبل خمسة شهور.

< الملوخية هسع ذنبها شنو؟.

< يندمك علي (الجامعة) الدرستها.

< عاوزين تعرفوا قصة (الملوخية).

< ما في داعي.

< قصة بايخة ومملة.

< لو حكيتي ليكم ...ما في زول تاني بشجع المريخ.

< المهم الزول يقعد (يتعذر) ليك كدا متل زول (الغسيل).

< يوم تمشي عليه.

< تدق الباب زي ...ما بحصل في كل يوم.

< دي فيها حاجة.

< يقوم يفتح ليك الباب واحد كدا...يقول ليك : عاوز منو؟.

< من طريقة السؤال باين عليه انو زول صعب.

< نحن ناسنا كلهم صعبين.

< ما عندنا زول ما صعب.

< ناس بنوموا بالضرس ...لما يقع براه في الواطة.

< مية مرة قلت ليكم الكلام دا.

< تقول ليه : عاوز (الجربندي).

< يقول ليك : الجربندي دا هسع كان قريب يكون في كسلا.

< سافر متين؟.

< سافر امس ...اوعك تكون عاوز منو قروش؟.

< الزول دا (البنك) ما عرف منو حاجة.

< والله انا (اتوكت) عدييل.

< اتكسرت...اتقصيت.

< انت ذاتك غلطان ...زول اسمو (الجربندي)...بتديه قروش ليه ...بدينو في الاساس ليه؟.

< انت قنعان من قروشك.

< تستاهل.

< اتعوض الله ساكت. واقنع من قروشك.

< ما برجع تاني. البرجعو شنو؟.

< شايف الشارع دا؟.

< شايفو.

< الشارع دا كلو عاوز منو قروش. يعني ما برجع.

< يا زول البرجعو شنو؟...اقول ليك (البنك) ذاتو طالبو.

< اقنع من قروشك ساكت.

< حكاية (الجربندي) دا ...زي حكاية (كلتشي).

< كلتشي مرقها في (نيوكاسل).

< هيع.

< ليك حق تمرقها في نيوكاسل.

< لاقي الدولارات ..وحايم برة.

< العرس في واشنطن...والعلاج في نيوكاسل.

< هملة.

< (تكية) عديل.

< زول لاعب مع الترجي البقعدو في السودان شنو؟.

< تصور يا كلتشي انت طلعت واعي.

< طلعت بتفهم.

< البقعدك شنو.

< ليك حق تسافر (نيو كاسل).

< ناس موسي الزومة ديل ...اصاباتهم بموتوا بيها عديل.

< بعالجهم بي (الجبيرة).

< وناس يعالجوهم في نيوكاسل.

< اشمعنا يعني؟.

< طمبل دا سنة بشكي من اصابتو ...زول اشتغل بيه ما في.

< لاسانا ..عشان عارفو جاء من الهلال...بقي كل تمرين يضربو.

< انتوا (حقدكم) دا ما عاوزين تخلوه.

< عشان كدا ...مفروض ناس الهلال يسفروا (طمبل) برلين ...عشان يتعالج هناك.

< طالما ناس المريخ ما عاوزين يشتغلوا بيهو.

< كلتشي اتعوق.

< ودوهو تونس...وخلوه في القاهرة.

< واخر حاجة سمعنا بيهو في (نيوكاسل).

< دي الاصابة وإلا بلاش.

< يعني وارغو لو اتصاب تودوه وين؟.

< تودهو (باريس).

< وارغو لو اتصاب ..بشطبوا في يونيو.

< انتوا عارفين لعنة الاصابات فتحت في لاعبي المريخ ليه؟.

< فتحت عشان ناس المريخ واعلام المريخ بالذات عندما اصيب يوسف محمد ..سخروا من الاصابة ..وشمتوا في الهلال.

< جرايد المريخ كلها طلعت بمانشيت يقول : يوسف محمد يغيب سنة من الملاعب.

< وفي جماعة كدا كتبوا جنس اعمدة في اصابة يوسف محمد.

< ونحن ذاتو ..قلنا مجدي شمس الدين غلطان.

< مجدي البخلي يتصور مع يوسف محمد قبل التسجيل شنو؟.

< المهم الايام لفت وجاءت.

< حافظ اتصاب. النفطي اتصاب. طمبل اتصاب.

< كلتشي اتصاب. سعيد السعودي اتصاب.

< عبدالحميد السعودي اتصاب.

< انا قلت ليكم ما تشمتوا في (اصابة) يوسف محمد.

< انتوا ما سمعتوا الكلام. قعدتوا تمشتوا.

< قعدتوا تغنوا غني.

< ونحن هسع بنرجع لاصابات لاعبي المريخ ليس شماتة ...لكن عشان تفهموا حاجة.

< ونسأل الله العودة السريعة لكل لاعب مصاب.

< وافتكر ناس المريخ وعوا الدرس.

< وفهموا الحصل.

< وما اظنهم تاني يشمتوا ليهم في لاعب اتصاب.

< لكن انا الحاجة الغايظاني ...الجماعة خلوا بله جابر.

< بله جابر دا ...يتصاب ويرجع وزول يحس بيه ما في.

< موسي الزومة نفس الشيء.

< وطمبل.

< بله جابر وموسي الزومة انتوا احرار معاهم.

< لكن هيثم طمبل دا نحن ما بنقبل فيه حاجة.

< الجلد ما بطلع من الضفر.

< عشان كدا يا عالجوه ..يا خلونا نعالجو ...نحن ما بطريقتنا.

< يعني هيثم طمبل دا إلا يرطن ليكم.

< إلا يتحدث ليكم بي لغة الهوسا.

< البشوف موسي الزومة وبله جابر يرطنوا تاني ما كذب. موسي قالوا دخل ليه معهد لتعلم لغة الهوسا.

< اصلوا في المريخ الواحد لو ما رطن ...ما بطلع ليه بي حاجة.

< العجب دا بطقطقها عديل. بخلي الكورة تتكلم.

< العجب سجل الهدف رقم 100 في الدوري الممتاز ...وبرضو زول بشتغل بيه ما في.

< ابعد حتة مشي ليها العجب في العلاج (القاهرة).

< ابعد من كدا ..ما مشي ليه حتة.

< كلتشي ....مرقها لي نيو كاسل.

< هيع. دي الاصابة وإلا بلاش.

< ملحوظة: بعد يومين وارغو بقول ليكم : انا ذاتي مصاب.

هوامش

< الحكاية فيها سفر لي نيوكاسل...البخليهو ما يتصاب شنو؟.

< تشهوا اللاعب في الاصابة.

< انتوا الشغيل اخبارو شنو؟.

< التسجيلات التكميلية جات.

< هسع لو استفدتوا من خانتو كان احسن.

< هو حمد الشجرة يعني استفادوا منو حاجة...عشان يستفيدوا من خانة الشغيل.

< الحضري عملها ظاهرة.

< يعني مفاوضات المريخ مع الحضري ....الحضري عملها مخصوص ، عشان يرفع بيها سعروا.

< كبري. وانتوا صدقتوا.

< ونحن ذاتوا صدقنا.

< الغريبة جمال الوالي طلع يصرح في الفضائيات المصرية.

< والله الحضري عملها شينة.

< لكن ان شاءالله نحن نحسم ليكم موضوع الحضري دا في الاسماعيلية.

< زول عمرو 38 سنة ...عاوزين بيه شنو؟.

< اهلو في الاهلي قالوا ما عاوزنو.

< انتوا يا ناس المريخ (الخفة) كاتلاكم.

< ما تشوفوا ليكم زول عمل ليه (حركة) إلا جريتو عليه.

< انا ما عارف اكرم الهادي سليم ...صابر عليكم كيف؟.

< استعدادات الهلال واصرار لاعبي الفريق ..تؤكد ان الهلال ان شاءالله سوف يتأهل علي حساب الاسماعيلي.

< ان شاءالله سوف يفعلونها.

< ما في حاجة فاتت.

< البرنس في صدرو في كلام.

< اصبروا ...ناس فييرا عندهم كلمة.

< انتظروا بس.

< خبر عاجل: نيوكاسل ..يا كلتشي.
a.nigoumi غير متواجد حالياً   رد مع اقتباس
إضافة رد

أدوات الموضوع
انواع عرض الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

كود [IMG]متاحة
كود HTML معطلة




الساعة الآن 05:08 PM


Powered by vBulletin™ Version 3.8.7
Copyright © 2020 vBulletin Solutions, Inc. All rights reserved. منتديات