العودة   ~ منتديات مدينة سنجة ~ > ®¤*~ˆ° الرياضه والاقسام الشبابيه®¤*~ˆ° > المنتدى الرياضى

إضافة رد
 
أدوات الموضوع انواع عرض الموضوع
قديم 02-06-2016, 12:50 AM   #331
كمال محمد (قجه)
:: المشرف العام ::
 
الصورة الرمزية كمال محمد (قجه)
 
تاريخ التسجيل: Feb 2010
الدولة: المملكة العربية السعودية - الرياض
المشاركات: 45,145
افتراضي

محمد عبد الماجد ( وان طال السفر )
انتظروهم انتم على موعد مع طارق أحمد آدم وتنقا ووالي الدين
الاثنين 1 فبراير 2016 الساعة 3:44
اصبروا على هذه المواهب – فكل الذين دخلوا لكشوفات الهلال في التسجيلات الاخيرة اصحاب موهبة كبيرة
مواهب الهلال الحالية فقط ينقصها (التجانس) والتفاهم ويحتاجون الى خبرة التعامل مع مباريات الهلال
نرجو من اشرف الكاردينال ان يصحح انتقال ابيكو في التسجيلات القادمة لينتقل اللاعب للهلال بشكل رسمي بدلا من ان يكون معارا
عمار الدمازين اعاد لنا عهد المدافعين الكبار في الهلال سيماوي وشيخ ادريس كباشي وطارق أحمد آدم
يمكن القول ان كل اللاعبين الذين تم تسجيلهم في فترة التسجيلات الماضية اثبتوا (نجاحا) ملحوظا (تشيل وتشرب منو) ، وقدموا تفوقا – دعونا نقول متفاوت من لاعب لآخر في المباريات القليلة التى لعبها الهلال رسميا ووديا.
مرات (شية الجمر) ذاتها لو ما لقت ليها شطة وليمونة وبصلة ما بتتأكل.
انتوا هسع عاوزين الشطة والليمونة والبصلة.
قد تكون المحصلة الكلية غير مرضية للهلالاب (في ناس زعلانة عديل كدا) – لكن لا بد من القول ان معظم لاعبي الهلال الذين دخلوا كشوفات الهلال في التسجيلات الاخيرة قدموا نجاحا في مشاركاتهم.
او دعونا نقول انهم قدموا (بوادر) وملامح تشير الى ان الهلال موعود بلاعين من الوزن الثقيل.
ح تشوفوا طارق أحمد آدم تاني.
وتنقا.
ووالي الدين.
وح ترجع (الصفوف) تمتد.
وقصب السكر.
وح تنسوا الباقى تاني عند ست الشاي في الاستاد.
فرحة ساكت.
ودهشة لي غادي.
مواهب الهلال الحالية فقط ينقصها (التجانس) والتفاهم ويحتاجون الى خبرة التعامل مع مباريات الهلال.
يا جماعة اصبروا.
الزول لو زرع ليه (بصلة) بيصر عليها.
انتوا عاوزين تحصدوا من (الشربة الاولى).
يا جماعة ما كدا.
اذا فصلنا حال بعض من سجلهم الهلال في الفترة الاخيرة سوف نخرج بالكثير من الفرح.
لمن نمرق ونقيف في الباب.
موش الزول البتكون فرحان بيه ..بتطلع تقدمو للشارع.
اصبروا بس.
قبل ان نخوض في تفاصيل الذين دخلوا كشوفات الهلال في التسجيلات الاخيرة ..نذكر ان الهلال حسم بشكل كبير صفقة اللاعب شرف شيبوب الذي ينتظر ان يدخل كشوفات الهلال في مايو القادم باذن اللـه وتوفيقه.
كما حسم الهلال صفقة بكري بشير مدافع هلال الابيض المتميز الذي قدم موقفا كبيرا في التسجيلات الماضية – نرجو ان يكمل مجلس الهلال خطواته نحو اللاعب ليدخل كشوفات الهلال في تسجيلات مايو لتكون تسجيلات الهلال في الفترة التكميلية محسومة ومحددة في اللاعب شيبوب وبكري بشير والمهاجم المحترف.
هذه ملفات حسمها مجلس الهلال مبكرا – نتمنى ان تكلل ان شاءاللـه في مايو القادم بالنجاح التام.
نعود ونتحدث عن لاعبي الهلال الذين دخلوا كشوفاته في التسجيلات الماضية ونتوقف عندهم تفصيلا.
المستعجل يفوت.
نتوقف اولا عند المدافع ولاعب الامل عطبرة السابق عمار الدمازين الذي قدم مباريات كبيرة واعلن عن نفسه بصورة تجعلنا نقول ان المدافع الذي يشبه الهلال قد ظفرنا به الآن.
زولنا ظهر.
دا الزول البنفتش ليه ذاتو.
تسجيل عمار الدمازين في الهلال كان صفقة ناجحة بكل المقايس وهو امر يجب ان يشكر عليه مجلس الهلال والجهة التى اشارت على المجلس بتسجيل هذا اللاعب.
العين التى رصدت عمار الدمازين وسط عشرات المدافعين الاكيد هي عين فاحصة وذات نظرة ثاقبة.
عين مفتحة.
عمار الدمازين اعاد لنا عهد المدافعين الكبار في الهلال سيماوي وشيخ ادريس كباشي وطارق أحمد آدم.
خلانا ننوم قفا.
عينا بقت قوية.
المدافع الذي يلعب بعقله ..ولا تحس بقدميه في كل العابه المشتركة مع مهاجم الفريق المنافس هو مدافع نادر وفريد في هذا الزمن.
يتميز عمار الدمازين بكل مقومات المدافع العصري حيث قوامه الطويل ..ورشقاته الكبيرة.
كذلك يتجنب عمار الدمازين (المخالفات) – وقد كان اكثر ما يعاني منه الهلال في السنوات الاخيرة المخالفات غير المبررة التى يقع فيها لاعبو الدفاع.
عمار الدمازين لا يرتكب مخالفة إلّا في الضرورة القصوى عندما يكون لا بد منها.
في عمار الدمازين ايضا ميزة نجدها في سيف الدين مساوي وهى احسانه للتقدم مع الهجمة واجادته للضربات العكسية.
فقد شاهدنا عمار الدمازين في اكثر من هجمة يتقدم ويقوم بتنفيذ ضربات رأسية تشكل خطورة كبيرة على مرمى الخصم.
الهلال كان يحتاج الى مدافع بهذه (الرشاقة) والخفة التى تجمّل تحركاته.
عمار الدمازين من اكبر المكاسب التى خرج بها الهلال في التسجيلات الاخيرة – ولو لم نخرج من التسجيلات بغير هذا اللاعب لكفانا ذلك.
افرحوا ساكت.
مفروض تقسموا حلاوة عديل كدا.
عليه نشكر فريق الامل العطبراوي كثيرا وهو يمنحنا لاعب بهذا المستوى.
دفاعيا ظهر ايضا في الهلال المحترف ابيكو اللاعب الذي انتقل للهلال معارا.
نرجو من مجلس الهلال ومن رئيسه اشرف الكاردينال ان يصحح انتقال اللاعب في التسجيلات القادمة لينتقل اللاعب للهلال بشكل رسمي بدلا من ان يكون معارا.
ابيكو مدافع مع قوته الجسمانية الكبيرة يتميز بعقلية دفاعية جيدة – وهو ما سيجعل الكثير من الاندية تتسابق من اجل كسبها في التسجيلات الرئيسيه في اواخر هذا العام عندما تنتهى فترة اعارته للهلال.
لذلك يجب ان يصحح الكاردينال انتقال اللاعب للهلال لينتقل له بشكل رسمي في تسجيلات مايو حتى لا يعز علينا كثيرا في تسجيلات نوفمبر.
ابيكو مع عمار الدمازين شكلوا ترسانة دفاعية قوية – رغم ان الفترة التى لعبا فيها سويا فترة قليلة.
مع ذلك ظهر دفاع الهلال خاصة في مباريات الممتاز بشكل مبشر – وهو يمكن لنا ان نعتبره اعلان منذ الآن لترسانة دفاع الهلال في وجود الحارس العملاق مكسيم.
هذا مع وجود اسماء كبيرة في دفاع الهلال مثل سيف الدين مساوي واتير توماس ومالك.
ايشيا والشيخ موكورو المحترفان في صفوف الهلال يمكن القول عنهما ان ما يقدماه من لمحات الآن يبشر بثورة احترافية كبيرة سوف تحدث في وسط الهلال.
فقط يحتاج ايشيا وموكورو لبعض الوقت ليكون عطاؤهما مكتملا.
علما ان اللاعبين لعبا في منتخابات بلادهم الاولمبية.
لذا يجب الصبر على موكورو وايشيا وعلينا كذلك ان نتذكر ان اي محترف يحتاج لبعض الوقت ليقدم كل ما عنده.
صبرنا على قودوين فكان من اعظم الذين لعبوا في المقدمة الهلالية فلماذا لا نصبر على ايشيا وموكورو؟.
في احيان كثيرة نحن نفسد هذه الصفقات بالحكم الانطباعي والمسبق الذي نفرضه على المحترف.
امنحوهما الفرصة الكافية وسوف نخرج بالكثير من الابداع والامتاع.
اللاعب ابوعاقلة لا اظن ان هناك خلاف حوله – اللاعب يقدم الآن مستويات كبيرة رغم من انه يلعب في اصعب الخانات وهو يلعب طرف يمين.
ابوعاقلة لاعب كبير ..بصمته لن تكون على مستوى الهلال فقط – بل على مستوى الكورة السودانية كلها.
ان كنا نراهن على لاعب مطلقا – فان رهاننا منذ الآن على اللاعب ذو الامكانيات المهولة ابوعاقلة.
ابوعاقلة مع امكانياته الفنية الكبيرة يتميز بالقوة الجسمانية – اما اجمل ما فيه فهو خلقه الجميل وانضباطه الكبير.
موهبة اخرى في الملاعب السودانية يمكن الرهان عليها – تلك الموهبة هي اللاعب ولاءالدين موسى.
ايضا لا اختلاف حول امكانيات اللاعب الفنية وعلى لمساته السحرية التى ظهر بها مع الهلال.
الشيء المفرح ان كل هذه العناصر صغيرة في السن – اذ لا يتجاوز عمر اكبرهم الـ (24) سنة.
هذه السن تحتاج الى الدعم والخبرات ..والصبر.
اصبروا على هذه المواهب – فكل الذين دخلوا لكشوفات الهلال في التسجيلات الاخيرة اصحاب موهبة كبيرة.
علما ان فريق الهلال ورديفه فيه الكثير من العناصر التى لا اختلاف حولها.
اذا حدث التجانس والتفاهم سوف نكون امام فريق باذن اللـه لن يقهر.
امنحوهم الدعم والسند.
وقبل ذلك اصبروا عليهم ..قبل ان تحكموا عليهم.
نحن على موعد ان شاءاللـه مع فريق يهز الارض.
رهاننا مازال قائما – والايام سوف تثبت ذلك وتأكده.
...........
ملحوظة : صبر ما في بس.
هوامش
في الهلال ظهرت عادة ما كويسة...اصبح الهجوم على (المدرب) هو الشماعة التى نعلق عليها الخلل.
ان لم نتجاوز محطة الهجوم على المدرب لن نحقق بطولة.
اي مدرب في العالم اذا ما صبروا عليه ما بقدر يعمل حاجة.
مجلس الكاردينال لو فكر في الاطاحة بـ (كافالي) يكون ارتكب اكبر حماقاته.
الجميل في الكاردينال انه لم يطح بالكوكي.
وانما غادر الكوكي من تلقاء نفسه.
لذلك نتنمى ان يمنح الكاردينال المدرب الفرنسي الوقت الكافي.
في ظل الانتقادات التى توجه لكافالي يبقى من المنطق ان لا يقدم الهلال العروض المنتظرة.
الهلال سوف يكون في تحسن مستمر.
من مباراة الى مباراة.
الى ان نصل للمستوى المطلوب قريبا ان شاءاللـه.
فقط ابعدوا من المدرب ..وانتقاد اللاعبين.
تصدير الانطباعات (الفنية) المحبطة امر يضر بالفريق.
الاعلام يتحمل الكثير من الاخطاء – لماذا تحمل كل الاخطاء للمدرب فقط.
اي مدرب جاء للهلال ..رأينا ان في دعمه ومساندته استقرار اكبر ومنافع اعظم للهلال.
لماذا نحكم على مدرب بعد مباراتين.
يا جماعة.
الزول دا فرنسي.
وعارف بعمل في شنو؟.
خلوه يشوف شغلو.
ما تقاطعوه.
الحلو بجيكم.
اصبروا بس.
الدنيا ما طارت.
متى انتصر الهلال في الابيض ..حتى يهاجم المدرب.
فريق هلال الابيض فريق محترم وقوى وبيستحق التعادل.
منطق الكورة بقول كدا.
.........
عاجل : الجوهرة الزرقاء وصلت وين؟.
__________________
كمال محمد (قجه) غير متواجد حالياً   رد مع اقتباس
قديم 02-06-2016, 12:54 AM   #332
كمال محمد (قجه)
:: المشرف العام ::
 
الصورة الرمزية كمال محمد (قجه)
 
تاريخ التسجيل: Feb 2010
الدولة: المملكة العربية السعودية - الرياض
المشاركات: 45,145
افتراضي

محمد عبدالماجد ( وان طال السفر )
حولنا الطبق شمال جاب لينا شيبوب مع عمار الدمازين
الثلاثاء 2 فبراير 2016 الساعة 2:53
حسن تلجة ..البتكلم ليكم عنو دا – يوم مباراة المريخ والرابطة قاعد يظبط في الطبق..يحول في (الطبق) متل صينية الخبيز
الزول دا صعب ..يمين جاب ليه لاعب من عطبرة اسمو (عمار الدمازين) لو جابوا لينا هسع بننسحب من الدوري الممتاز
عمر بخيت حايم في نص المريخ متل ناظر المدرسة في نص الحوش في آخر الحصص
زولكم ما كضب ..وقال المريخ دا مالو بقى كدا زي الناس القاعدين في دكان ناصية...ما عندهم أي موضوع

مريخابي ..قنعان من فريقو – قعد يظبط في (الطبق)...بيظبط في الطبق من غير نفس ..زي البفرك ليه في بامية.
يحول فيه جاي وجاي...ويطنطن براهو – الحالة ما عاجباه.
وزيادة الغاز باقية ليه في نخرتو.
المريخابي اسمو (حسن تلجة).
جنو (تلج).
شغال في الدنيا دي كسار تلج.
يوم داك – لقتيو موقف عربيتو في طرف الشارع ..ونازل ليك (كسير تلج) لعسكري المرور.
العسكري من كسير التلج داخل ليك في السيوتر زي الجردل.
حسن تلجة ..ما خلى ليك شيء للعسكري.
رفعو ليك السماء.
العسكري اللـه يسألنا رتبتو (وكيل عريف)...حسن تلجة رفعو ليك (فريق).
العسكري ذاتو صدق.
بقى يرفع في كتوفو.
ويمشي ويعاين في نفسو في مراية العربية.
وقفت العربية على طرف ..ومشيت على حسن تلجة ...قلت ليه يا زول مالك بتكسر في التلج من الصباح – العسكري دا طلع ليه (الرخصة) وخارجنا – قافلين الشارع – وقفتو الحركة.
حسن تلجة قال لي أنا لو عندي (رخصة) كنت وصلتو (فريق) – واللـه (شريط) ما بديه ليه في البرد دا – شوف عامل رأسو كيف زي الزول البفك ليه في (لمبة) حرقانة.
سكت – ما قلت شيء.
لكن قلت في نفسي .. يا حسن تلجة لكن ما بالغت – توصلو (فريق)...الزول دا لو ما لحقناك كان مسكتو مرور الخرطوم.
ومشيت على كدا.
حسن تلجة ..البتكلم ليكم عنو دا – يوم مباراة المريخ والرابطة قاعد يظبط في الطبق.
يحول في (الطبق) متل صينية الخبيز.
الزول دا قدر ما (اتحرفن)..ووجه (الطبق) – التلفزيون ما جاب ليه زول غير (علي جعفر).
يلفو كدا يجيب ليه علي جعفر ..يلفو كدا يجيب ليه التومة بنت حاج حامد واقفة في طرف الشارع.
حسن تلجة – عاين لي علي جعفر كدا وهو بيصرج ليه في كورة – وقال واللـه الزول دا (حجر بطارية) كتيرة على كورتو دي – كمان نقعد نحول ليه في الطبق.
الصبر بس.
اللـه يدينا الصبر.
وصاحبكم بلف في الطبق...وبحول فيه من اتجاه لي اتجاه...تقول سايق ليك (كراكة).
عصر شمال كدا...الطبق جاب ليه عمر بخيت.
عمر بخيت حايم في نص المريخ متل ناظر المدرسة في نص الحوش في آخر الحصص.
حسن تلجة عاين للتلفزيون سمح ..وقال دا شنو دا؟ ..كمان (الطبق) بتاع النيلين دا بقى يعملها كبيرة – عمر بخيت البجيبو المريخ شنو؟.
طبق ناس النيلين دا (ساطل).
واحد جنبو قال ليه فعلاً (سطلايت).
مشى شرق ..شاف ليك (عطرون) قاعد في الكنبة.
متل الزول الحارس ليه دكان.
حسن تلجة ما كضب ..وقال المريخ دا مالو بقى كدا زي الناس القاعدين في دكان ناصية.
ما عندهم أي موضوع.
تفتح أي موضوع يتكلموا ليك فيه.
عارفين أي شيء.
حسن تلجة قدر ما عفص ليك الطبق دا ..عشان يشوف (شيبوب) ما شافو.
يلفت في (الطبق) متل رجل المرور.
وبرضو ما شاف (شيبوب).
حسن تلجة – خجلان يسأل من (شيبوب) عديل كدا.
قال يتحرفن.
قام قال ليهم ..أنتوا تعالوا هنا ..المريخ دا كان فيه ولد حريف كدا ..بيلعب في النص...الزول دا مشى وين؟.
واحد خجلان برضو من أنو يقول ليه (شيبوب) – قام قال ليه (أيمن سعيد).
حسن تلجة قال ليه أيمن سعيد شنو؟...أيمن سعيد الحرفنة لقاها وين ؟..زي الزول البكون منتظر عدة الضبيحة يوم العيد.
واحد من الجماعة قال ليه أنت قاصد منو يا حسن تلجة؟.
حسن تلجة قال ليه – ولد صغير كدا ..ولعاب شديد ..وطويل ...واللـه وقت نشوفو في النص – الواحد فينا زي الضرب ليه طلب سمك.
زولكم الخجلان – رجع وقال ليه ...أنت قاصد منو يا حسن ...أنت قاصد (الشغيل).
حسن تلجة قال ليه – لا ما الشغيل ..الشغيل خليه ..عارفنو مشى شبيبة القيروان ، أقصد مشى الهلال ..أنا قاصد ليك الولد الجاب ليه قون في الاتحاد الجزائري.
صاحبو قال ليه ..القون الما عدوه داك.
حسن تلجة قال ليه بس ..كتلتو عديل كدا ..أنا قاصد الزول دا ذاتو ..الزول دا مشى وين؟.
صاحبو قال ليه ..أسكت ..أسكت ..أسكت يا حسن نحن الزول دا ما كتلنا فيه.
حسن تلجة قال ليه كلتنا فيه كيف يعني؟ ..مشى برشلونة؟.
صاحبو قال ليه يا ريت.
حسن تلجة قال ليه مشى الأهلي المصري؟.
صاحبو قال ليه يا ريت.
حسن تلجة قال ليه مشى الزمالك؟.
صاحبو قال ليه يا ريت.
حسن تلجة ..قال ليه طيب مشى وين؟.
صاحبو قال ليه مشى شبيبة القيروان.
حسن تلجة من سمع اسم (شبيبة القيروان) – قال ليه أوعك تقول لي شبيبة القيروان (كبري).
صاحبو قال ليه تصدق.
حسن تلجة قال ليه أوعك تقول لي عشان ينتقل للهلال.
صاحبو قال ليه ..تصدق.
حسن تلجة جاء واقع من رأس البيت ..وقال لي صاحبو – نحن ما كتلنا.
كتلنا عديل كدا.
يا ريتهم لو شالوا بكري ولدهم الأروش دا غير (فتر) العيون ما شفنا منو شيء.
الزول دا الكورة العند ناس راجي ورمضان عجب ..شتتها ليهم (جري).
وناس الهلال شالوا الزول دا كيف؟.
دي فكروا فيها كيف؟.
عملوا شنو؟.
وصلوا ليه كيف؟.
صاحبو قال ليه ..واللـه الكاردينال دا بعد كدا أتوقع منو أي حاجة...هسع ابراهومة ولدنا دا ..كل يوم بنقوم الصباح ..بنتخيل يقولوا لينا مشى الهلال.
واللـه ثقة في مازن شمس الفلاح بقت ما عندنا.
حسن تلجة قال ليه واللـه أنا قايل الحركات دي عند صلاح إدريس بس ..الزول دا طلع أخطر من صلاح.
صاحبو قال ليه صلاح شنو؟..الزول دا الجوهرة الزرقاء عملها تلاتة طوابق...فندق بس.
الزول دا صعب ..يمين جاب ليه لاعب من عطبرة اسمو (عمار الدمازين) لو جابوا لينا هسع بننسحب من الدوري الممتاز.
وعندهم ولد كمان اسمو أبو عاقلة..تختوا في الجرح يطيب.
حسن تلجة ..وقت سمع الكلام دا ..قال ليه طيب نحن القاعدين ليها شنو؟...طبق شنو البنظبط فيه...ناس علي جعفر ديل أصلو ما عاوزين ليهم (طبق).
ديل – الواحد يشوف ليهم حجرين بطارية ..ويسمع بيها نتيجة المباراة.
متابعة المباراة في الإذاعة ذاتها كتيرة عليهم.
......
ملحوظة : حسن تلجة لكن زول غريب واللـه.
هوامش

قالوا ليك في واحد شفت.
درس هندسة بالمساء.
تماها بالجغرافيا.
قالوا ليك الزول دا وقت يحول الطبق بجيب ليه شيبوب مع عمار الدمازين.
قلنا ليهم دا طبق ولّا (ودع)؟؟ البجيب عمار الدمازين مع شيبوب.
الفيفا اعتمدت شيبوب في الهلال.
أقصد في شبيبة القيروان.
أنتوا مالكم مستعجلين كدا.
أصبروا شوية.
الدنيا ما طارت.
الكاردينال طلع خطير.
اجتاز الورقة الثانية بنجاح تام.
مبروك.
وفي الانتظار اكتمال العملية.
الهلال الآن في أفضل حالاته.
وأفضل مستوياته.
وسوف يصل مستوى الهلال إلى المستوى الذي يحلم به الهلالاب.
بس أصبروا.
وخلوا العيش لكافالي.
الزول دا ما تضيقوا عليه.
الحلو جايكم.
ما تغسلوا أيديكم.
غداً يلعب الهلال أمام مريخ نيالا.
بدينا بي هلال كادوقلي وهلال الأبيض ..وجينا على مريخ نيالا.
والسنة دي ما في أي مريخ بقيف قدامنا.
هلال ممكن.
لكن مريخ لا.
الأمل عطبرة يقدم في أفضل المستويات.
الأمل عطبرة 6 من 6.
ازيكال مهاجم الأمل ..هداف البطولة.
يستحق الأمل ذلك.
وهذا ثمن المواقف.
النيل شندي والأهلي شندي كلاهما انتصر خارج أرضه.
انتصر النيل في الفاشر ..وانتصر الأهلي في كادوقلي.
الأهلي الخرطوم أيضاً عاد بـ (4) نقاط.
الدوري ح يكون مولع نار.
وكل الأندية قابلة لأن تفقد الكثير.
الصبر بس.
ما في نتيجة بيصلوا ليها من خلال أسبوع.
أو أسبوعين.
وما في ممتاز بشيلوه في أسبوعين.
الدرب طويل.
والفريق الذي سوف يحقق البطولة هو الفريق البيصبر على مدربه.
ادعموا الهلال وساندوه.
وح تشوفوا الكتير من الروائع.
.........
عاجل : لكن شيبوب عملها ظاهرة.
__________________
كمال محمد (قجه) غير متواجد حالياً   رد مع اقتباس
قديم 02-06-2016, 12:59 AM   #333
كمال محمد (قجه)
:: المشرف العام ::
 
الصورة الرمزية كمال محمد (قجه)
 
تاريخ التسجيل: Feb 2010
الدولة: المملكة العربية السعودية - الرياض
المشاركات: 45,145
افتراضي

محمد عبد الماجد ( وان طال السفر )
طريقة جديدة لتقديم النقاط للمريخ عبر تقديم المباريات
الأربعاء 3 فبراير 2016 الساعة 4:01
هذا افضل توقيت يمكن ان يلعب فيه المريخ امام هلال ومريخ الفاشر ...وهما اضعف اندية الممتاز في الوقت الحالي
العميد دا هسع في زول سألو – عشان يطلع ويقول كلامو دا...ويقعد يبرر ..ويقول ان القرار قرار (فني)
الهلال طول عمره بيلعب في البطولات الافريقية ما حصل سمعنا بي كلام دا ..ولم تقدم له مباراة واحدة
مجلس المريخ في (مسرحية ) ما اقتنع بيها اي زول مسرحية بطولة الفادني وجمال عبدالرحمن – كان قد اعلن عن رفضه للبرمجة الجديدة

بدون مناسبة – (وما في زول سألو) او قال ليه حاجة – اتبرع من عنده كدا وطلع.
فقد خرج علينا العميد عامر عبد الرحمن الامين العام لنادي المريخ وقال ان المجلس كان جادا في مسألة رفض البرمجة الجديدة لمباريات الفريق واعلن تمسكه بالبرمجة القديمة .. واشار الى ان اللاعبين والجهاز الفني اصروا على السفر للفاشر واداء مواجهتي المريخ والهلال واوضح ان قرار السفر للفاشر قرار فني وليس اداري.
يا راجل.
هذا الدور ..جمال حسن سعيد ما بقدر يقوم بيه.
العميد دا هسع في زول سألو – عشان يطلع ويقول كلامو دا...ويقعد يبرر ..ويقول ان القرار قرار (فني).
الفى رأسو (بطحة) ...بعمل شنو يا جماعة..
مجلس المريخ في (مسرحية) ما اقتنع بيها اي زول ..مسرحية بطولة الفادني وجمال عبدالرحمن – كان قد اعلن عن رفضه للبرمجة الجديدة.
البرمجة الجديدة طبعا بتخص المريخ وحده.
لا فى برمجة جديدة ولا حاجة.
دي برمجة موضوعة مخصوص للمريخ.
برمجة للمريخ فقط.
لي ناس علي جعفر بالتحديد.
عشان الموضوع ما يبقى ظاهر في ظل تبادل الادوار بين الاتحاد والمريخ ، قام مجلس المريخ برفض البرمجة الجديدة التى اصدرها الاتحاد العام والتى قدم من خلالها مباريات المريخ امام هلال الفاشر ومريخها لتلعب في الاسبوع الثالث والرابع على التوالى بعد ان كانت البرمجة (الاصلية) للاتحاد العام قد وضعت مباراتي مريخ الفاشر وهلالها مع المريخ العاصمي في الاسبوع السابع والثامن للدوري الممتاز.
الاتحاد العام بحجة ان هذه المباريات في توقيتها السابق تأتي مع مباريات المريخ الافريقية قرر ان يقدم هذه المباريات لتلعب في الاسبوع الثالث والاسبوع الرابع.
مسرحية خطيرة.
خلونا نسأل ..ونقول الاتحاد العام من متين قاعد يعمل هذه (الخدمة) التى خصصت الآن للمريخ.
الهلال طول عمره بيلعب في البطولات الافريقية ما حصل سمعنا بي كلام دا ..ولم تقدم له مباراة واحدة.
ولا بالغلط.
حتى المريخ لم يكن في السابق يفعلون له ذلك.
الوطنية دي جاتكم فجأة كدا من وين يا اسامة عطا المنان؟.
هذا الموسم ..الاتحاد العام قرر ان يغير في اساليب الخدمة التى يقدمها للمريخ.
بحاولوا يتراشقوا ...ويعملوها ظريفة هذه المرة ..رأوا ان يدعموا المريخ بالنقاط بصورة غير مباشرة.
قاموا قدموا مباراة الاسبوع السابع والثامن لتلعب في الاسبوع الثالث والرابع ..عشان هلال الفاشر ومريخها ثبت انهما الآن الاضعف.
وهذا افضل توقيت يمكن ان يلعب فيه المريخ امام هلال ومريخ الفاشر ...وهما اضعف اندية الممتاز في الوقت الحالي.
الاكيد ان هلال الفاشر ومريخها في الاسبوع السابع والثامن سوف تكن جاهزيتهما ارتفعت واستعدادهما سوف يكون وصل الى المستوى الذي يؤهلهما الى عرقلة المريخ.
اما في هذه الايام – فان هلال ومريخ الفاشر يمران باسوأ حالاتهما – لذلك قرر اتحاد الكورة ان يقدم المباريات للمريخ بحجة ان المريخ في الاسبوع السابع والثامن سوف يلعب افريقيا.
تعيش الوطنية.
يا سلام على بعد النظر.
وبعد الوطنية ذاتها.
حقيقة الامر ان تقديم المباريات كان نتاج ضعف هلال ومريخ الفاشر...فقد فضل المريخ ان يلعب معهما في هذا التوقيت بالذات.
المعروف ان اندية الولايات تكون غير جاهزة للممتاز في بدايات المنافسة ..عدا اندية اهلي شندي وهلال الابيض الذان يستعدان قبل فترة من بداية المنافسة بمعسكرات خارجية.
اما هلال ومريخ الفاشر فان قوتهما لا تظهر إلّا بعد الاسبوع السابع.
ذلك يفسر لماذا قدم الاتحاد مباريات المريخ (الفاشرية) – ولماذا حاول مجلس المريخ (المستجد) ان يظهر ان ذلك الامر مرفوض عندهم ، وذلك عبر تصريحات مختلفة لمجلس المريخ اكد فيها عدم الالتزام بالبرمجة الجديدة.
رغم ان الاتحاد العام يقول ان هذه البرمجة من اجل مشاركة المريخ الافريقية.
يعني الاتحاد عاوز مصلحة المريخ اكثر من مجلس المريخ.
ومجلس المريخ عشان ما يكشف الاتحاد ..بقوم يعمل فيها معترض على البرمجة الجديدة.
وفي النهاية يقول ليك الجهاز الفني واللاعبين قرروا ان يلعبوا في الفاشر.
يعني القرار (فني).
لذلك نحن تعجبنا من اعتراض المريخ على البرمجة الجديدة ..إلّا اذا كان الاعتراض يأتي في سياق (المسرحية) التى وضعها الاتحاد العام لخدمة المريخ واشرنا لها في تبادل الادوار سلفا.
لقد وجد الاتحاد العام ان تقديم النقاط للمريخ بالصورة (التقليدية) التى قدم بها نقاط مباريات خسرها المريخ في الملعب عبر لجنة الاستئنافات لن يمر هذا الموسم مرور الكرام.
خاصة ان ما فعله الاتحاد في الموسم السابق ..نسف (عمليا) الموسم وجعل الهلال والامل عطبرة والميرغني كسلا ينسحبون من الدوري الممتاز.
هذا العام جاء الاتحاد العام لكورة القدم بحيلة جديدة وهي تقديم نقاط المباريات عبر تقديم المباريات التى يمكن ان تكون صعبة في الاسابيع المقبلة لتلعب في الاسابيع الحالية بدون خطر.
لا نعرف كيف للاتحاد ان يتدخل في برمجة يقول انها وضعها عبر (القرعة) ؟ ..لا نعرف كيف يكون للاتحاد هذا التدخل الذي يمكّنه من ان يضع مباريات المريخ بالصورة التى تكون اكثر فائدة له.
حتى وان كان داعي الاتحاد العام المصلحة (الافريقية) فان ذلك الامر لا يصح ..لأن استنثاء المريخ هنا فيه كل الظلم.
ثلاثة اندية اخرى تلعب افريقيا بقيادة الهلال والاهلي شندي والخرطوم الوطني لماذا لم تخصص لهم مثل هذه البرمجة.
لماذا المريخ وحده.
لقد وجد الاتحاد العام ومجلس المريخ ان هلال ومريخ الفاشر هما الاضعف في الوقت الحالي – لذلك قرروا ان تكون مباريات المريخ في الاسبوع الثالث والرابع امام قمة الفاشر ليتمكن المريخ من تجاوز (عقبة) كانت سوف تشكل خطرا كبيرا على المريخ لو ان مبارياته في الفاشر مع قمتها تأتي في الاسابيع التى حددتها قرعة الممتاز.
على العموم البرمجة الجديدة ..هي خلل اخر وفساد جديد من الاتحاد العام يمارسه من اجل المريخ.
الهلال في الموسم الماضي كان له موقفا قويا ..نرجو ان لا يفوت ذلك على مجلس الهلال في هذا الموسم.
نحن لا نطالب بالانسحاب من المنافسة بسبب هذه (الخرمجة) – لكن نطالب من مجلس الهلال ان يكون له موقفا ليوقف هذا العبث.
اما اذا تكررت (الخدمة) وخرجت علينا في اشكال مختلفة وجديدة – فان الانسحاب من هذه المنافسة (الكارثية)..والمفصلة بغير حق للمريخ يصبح امر لا بد منه.
الدوري الممتاز بهذه الصورة لن يستمر ..وان استمر لن يكون منه فائدة ..طالما يتحكم اسامة عطا المنان ومعتصم جعفر في (نتائج) المباريات وفي تحديد سير بطل المنافسة والهابط والصاعد.
الآن اتضح انهم يسيطرون ويتدخلون حتى في القرعة والبرمجة لتأتي بالكيفية التى تخدم المريخ وتنفعه.
هذه الخدمات والنقاط التى يقدمها الاتحاد للمريخ لن تنفعه ولن تفيده في شيء ..سوف تجعله اكثر ضعفا واكثر تفككا.
لذلك يجب ان لا يسعد بها المريخاب او يفرحوا.
مكر البرمجة الجديدة نفسه سوف يعود بالخسران على المريخ في الفاشر – لأن المريخ ايضا ضعيف في هذه الايام – لكن اهله لا يشعرون بذلك.
.........
ملحوظة : الفاشر عندها كلمة ان شاءاللـه.
هوامش
عمر بخيت هو النجم الاول في المريخ الآن.
خير دليل.
يا حليل (شيبوب).
شيبوب الايامات دي قالوا ليك آخر راحة في تونس.
شيبوب بيستعد للبطولة الافريقية من تونس.
شيبوب بيستعد للدورة الثانية من الممتاز.
لكن ياتو ممتاز.
خلوها في سركم.
الهلال يلعب اليوم في جوهرتها الزرقاء امام مريخ نيالا.
موعد من الروعة وولاءالدين.
والثعلب.
وكاريكا وبشه.
والدمازين.
الهلال ان شاءاللـه اليوم يقدم مباراة كبيرة.
ادعموه وساندوه وانتظروا الهلال.
رهاننا على ان الهلال سوف يقدم افضل مواسمه في هذا الموسم.
الاستقرار كل ما يحتاجه الهلال في هذا الموسم.
لو وجد الهلال الاستقرار فانه سوف يحقق كل الآمال والطموح.
والاستقرار اكيد باستمرار المدرب والجهاز الفني ككل.
خلوا كافالي يشتغل.
وما تدخلوا في شغلو من المدرجات.
نتمنى ان لا تتلفز المباراة كما اعلن مجلس الهلال.
لا الاتحاد ولا التلفزيون يستاهلوا ان يظهر لهم الهلال من خلال النيلين.
يا وليد الشعلة انطلق.
لو سألوني ..وقالوا لي ادخل فنيا ..لتمنيت كاريكا والشعلة وولاء الدين في خط المقدمة الهلالية.
ثم صلاح الجزولي والثعلب في الشوط التاني.
كتروا لينا العناصر الهجومية.
المتعة دائما في الهجوم.
كما انه في وجود الشغيل وابوعاقلة ومكسيم والدمازين في الدفاع ...يبقى ما في اي خوف على شباك الهلال.
اللـه يحرسهم نجوم الهلال.
ما شاءاللـه عليهم.
عاوزين اكتر من خمسة.
زيدوا الغلة.
وكتروا الاهداف.
هيثم مصطفى الظهور الاول في الجوهرة (مدربا).
اللـه يكفينا شر الحكام.
وشر الاصابات.
الجمهور يتوقع في حال عدم تلفزة المباراة ان يحقق رقم قياسي.
.........
عاجل : المتعة تبدأ اليوم.
__________________
كمال محمد (قجه) غير متواجد حالياً   رد مع اقتباس
قديم 02-22-2016, 07:29 PM   #334
كمال محمد (قجه)
:: المشرف العام ::
 
الصورة الرمزية كمال محمد (قجه)
 
تاريخ التسجيل: Feb 2010
الدولة: المملكة العربية السعودية - الرياض
المشاركات: 45,145
افتراضي

محمد عبدالماجد ( وان طال السفر )
الشيخ موكورو شيخ الطريقة (البحتوكانية)
الأربعاء 17 فبراير 2016 الساعة 5:40
مرة والناس (متلفحة) اشواقها..ركبنا لينا (لوري) قديم ..امعانا كدا في (البهدلة)
الحلة لمن يكون فيها بكاء ..اي زول بلاقيك ..لو سألتو من (نتيجة المباراة) بوصف ليك (بيت البكا)
الشيخ موكورو جاب ليه قون..لا اقول ليكم (هندسي) من حيث (الابعاد)..لا اقول ليكم (طبي) من حيث (التشخيص)
الطريقة البحتوكانية دي ...(بهق) بيمسك (الباكات)..الباكات المباراة كلها بقعدوا ينكرشوا..وكان لحراس المرمى ..ما في حارس بقيف قدام الطريقة دي وبتم المباراة
نظرية الزول الواقف في الشارع ..يا يسألك الساعة كم؟.
يا يطارشك.
يطارشك كدا في الـله.
من غير سبب.
مطارشتو احسن من يسألك من الساعة؟.
قالوا ليك (روسي) عندو حول خفيف كدا....الحول في حد ذاتو ما فيه مشكلة ..لكن الروسي رأسو كعب.
بكون عاوز يفتح (المروحة) بقوم يفتح (المكيف).
في البرد دا.
بكون عاوز يفطر ...بقوم يتغدي.
مرة قال عاوز يدخل قاعة الصداقة يحضر ليه فيلم هندي ..لقيناه في دار الرياضة ام درمان بحضر ليه في مباراة في دوري التالتة.
بعد المباراة قلنا ليه : اها الفيلم الهندي كيف؟.
قال لينا والـله الفليم الهندي طلع كلو (كورنرات).
يوم داك اشترى ليه رصيد زين ..نزلو في ام تي ان.
الروسي دا ..يوم كدا ..قال عاوز يعرس..عمتو (الروسية) قعدت ليه في الواطة قالت ليه عليك الـله ما تعرس ..تقوم (تموت) لينا ساكت.
طبعا ممكن يعملها.
يقول عاوز ادخل (القفص الذهبي) يقوم يدخل (ود اللحد).
ود اللحد والقفص الذهبي الايامات دي بقى ما فيهن فرق كبير.
دي كلها نظريات.
نظرية الزول الصارف ...يغشى السوق يشتري ليه (كيلو موز).
يجيبو مدلدلو في ايديه متل (بداية السطر).
لو اشتريت ليك (15) رغيقة سخنة من الفرن لمن تصل البيت بتصل بيهم (سبعة).
دي نظرية الرغيف السخن.
الحلة لمن يكون فيها بكاء ..اي زول بلاقيك ..لو سألتو من (نتيجة المباراة) بوصف ليك (بيت البكا).
مرة والناس (متلفحة) اشواقها.
ركبنا لينا (لوري) قديم ..امعانا كدا في (البهدلة).
السماني ود عطش البحر ..ركب قدام ..قال هو زول كبير في السن وعندو (غضروف).
الواحد ما بعترف بي سنو – إلّا وقت يكون عاوز يركب قدام.
عمك قال بيسف – عاوز يقعد قصاد الشباك.
زمان في موضة (الشباك).
الواحد يركب في (البص) ويقعد جنب الشباك ويقول ليك ..(بسف).
طوالي تزح ليه.
في ناس بقوا يسفوا (التمباك) عشان يقعدوا جنب الشباك.
هسع البسفوا بقوا ما محتاجين ليهم (شباك) ...بيبلعوا طوالي.
السماني ود عطش البحر ..ركب قدام ونحن زي 21 نفر ركبنا ورا.
متفنين في (اللوري) متل الناس البتلقاهم مكومين قدام المستشفيات.
قالوا ليك الهلال ظهر فيه (شيخ) جديد.
شيخ سرو باتع.
الهلال جاب ليه شيخ اسمو (الشيخ موكورو).
الشيخ موكورو دا بشيل (الغضروف).
والتهابات الكلي.
والحيرقان.
وبيقلب الموية (روب).
يوم داك جابوا ليه (سحلية) قلبها (ديك).
كلنا قلنا الكلام دا كضب.
اصلو ما معقول.
دا كلام (خرافات) ساكت.
واحد قام زعلان ..من كلامنا دا ..وقال لينا الشيخ موكورو دا بيسخطكم.
يوم داك جابوا ليه (13) باك ..قلبهم ليك كلهم (رجال راية).
يا زول شيخ موكورو دا ناس الاهلي شندي ديل جابوا ليه قون عديل كدا..ما فيه اي شيء.
حكم الراية من غير ما يشعر ..قام رفع رأيتو.
المريخاب قالوا للحكم دا شنو البتعمل فيه دا؟.
حكم الراية قال ليهم ..الراية اترفعت براها – ما عملت ليها اي شيء.
عشان كدا نحن سمعنا الكلام دا ..وقلنا نمشي نشوف الشيخ دا حكايتو شنو؟.
21 نفر راكبين ورا ..واتنين راكبين قدام مع السواق.
اتلملمنا كلنا وقلنا نمشي على شيخ موكورو.
العاوز يسافر برة ..ويطلع من البلد.
والعاوز يتم البيت.
والعاوز يعرس.
والعندو (مصران).
والعندو مشاكل مع نسابتو.
اي واحد ..شايل مشكلتو وقال عاوز يشوف الشيخ موكورو ويحكي ليه عن مشكلتو.
يمكن الشيخ دا بعد الكلام السمعناه عنو يلقى لينا حل.
اللوري دخل بينا الخرطوم مع المغارب.
تقول راجعين من (المقابر).
حالتنا بي البلاء.
البتشوفو مننا كلو ما بتعرفو.
انا كنت واقف ساعة ونص بكورك لي (التميتري ود سعد) ..وهو واقف قدامو.
التميتري ود سعد وقت قال لي هووي ..انا قدامك ..قلت ليه إلّا تطلع رقمك الوطني عشان اصدقك.
طلع لي الرقم الوطني ..قلت ليه مالك بقيت زي ناس 1883 الشاركوا في حروب المهدية.
واحد مننا قال الكلام الكتير خلوه ..... تمروا (خلقكم) دي ...قبل ما تدخلو بيها الخرطوم.
اتمرنا لينا في اقرب ماسورة..واتنفضنا.
سألنا من الشيخ موكورو.
قالوا لينا انتوا بتسألوا من شيخ الطريقة (البحتوكانية).
قلنا ليهم والطريقة دي كمان شن نفرها.
والـله نحن جينا من عندنا اي خلافية بالموضوع دا ..وما عندنا عنها اي معلومة.
قالوا لينا الطريقة البحتوكانية دي ...(بهق) بيمسك (الباكات).
الباكات المباراة كلها بقعدوا ينكشروا.
وكان لحراس المرمى ..ما في حارس بقيف قدام الطريقة دي وبتم المباراة.
الحارس لا بد يغيروه.
قلنا ليهم والـله دي طريقة خطيرة.
قالوا لينا الطريقة دي ..خلت ليك المريخاب من الاسبوع الخامس يدخلوا بـ (الكمامات).
عشان (البحتوكانية) دي بتعمل حساسية شديدة.
دخلنا المباراة – قلنا نشوف الشيخ البتكلمو عنو دا.
لقينا ليك الشيخ دا بعمل ليه في جنس عمايل.
الباك بدخل عليه بـ (21) ضرس ..بطلع بـ (3) ضروس.
والبيشكي ليك من الرباط الصليبي.
والبيشكي من الكاحل.
الباكات يتجاروا ليك قدام الشيخ موكورو متل (اولاد المدارس) آخر البيوت.
امس نحن قاعدين ..نتفرج في التلفزيون.
الشيخ موكورو جاب ليه قون.
لا اقول ليكم (هندسي) من حيث (الابعاد).
لا اقول ليكم (طبي) من حيث (التشخيص).
الشيخ موكورو امس بعد ان سجل الهدف في الرابطة كوستي ..حارس الرابطة طوالي طالب التغيير.
وعمار كريمة ذاتو بقى من غير مناسبة ..اللاعب البقابلو كلو بكشحو ليك بي (كرت اصفر).
المباراة من الكروت الصفراء ..النجيلة ذاتها صفرت.
زول من الناس الشاهدوا المباراة في الاستاد ..وقت شاف الشيخ موكورو بيعمل في العمايل دي..وقف ليك في نص الجمهور ..وقال لي شيخ موكورو ..يا شيخنا (الكورة) عرفناها ..عملت لينا فيها اي حاجة ...الزيادات الفي (الموية) دي عملت لينا فيها شنو؟.
قالوا ليك الزول قال كلامو دا ..واختفى من الاستاد.
تاني ما في زول شافو.
ما عارفو راح وين؟.
...........
ملحوظة : تلات نقاط ..وشباك نظيفة ...ما في اجمل من كدا.
هوامش
الهلال في الشوط الثاني من عمر المباراة ظهر بمستوى متراجع.
الرابطة سيطرت تماما على المباراة.
لولا هدف الشيخ موكورو الثاني ..المباراة كانت ح تتعقد شديد على الهلال.
لكن فرق الهدفين ..انهى المباراة من الشوط الاول.
مبارك سليمان وهيثم مصطفى كانوا اذكياء ولعبوا بنفس تشكيلة كافالي.
بما في ذلك ابوعاقلة الذي لعب في الطرف اليمين.
وحل اطهر الطاهر محل بشه نتيجة لاصابة الاخير.
وهذا تأكيد على نجاح كافالي وطريقته وتشكيلته.
وما يؤكد نجاح كافالي ان الهلال في الشوط الثاني كان بيظهر بصورة افضل.
امس الهلال ظهر في الشوط الثاني بمستوى اقل كثير من الشوط الاول.
لكن طبعا لا لوم على الجهاز الفني باعتبار ان مبارك وهيثم يشرفانعلى الهلال في ظروف صعبة.
طارق العشري ..اكيد شاف الهلال وعرف الخلل.
الهلال سوف يواجه مريخ كوستي بعد اسبوع.
وهذه فرصة جيدة لطارق العشري.
وفرصة جيدة لعلاج الاصابات وسط لاعبي الهلال.
ولرفع معدل اللياقة.
يمكن ان نقول ان الهلال تجاوز محطة صعبة بفوزه على الرابطة.
صعوبة المباراة تأتي لأن الهلال يقوده جهاز فني جديد.
اعلام الكار(دينار) ...حاول ان يشوه صورة كافالي بخلافاته مع اللاعبين.
فتحدثوا عن خلافه مع ولاءالدين ومع نيلسون.
ولم يثبت لنا هذا الخلاف ..بعد الاطاحة بالفرنسي كافالي ..لأن لاعبي الهلال امس ادوا المباراة بشيء من الكسل..وهذا امر لم يكن ظاهرا في فترة كافالي.
حتى الروح المعنوية لم تكن مرتفعة.
اذا كانت هناك خلافات بين اللاعبين او اعترضات عليه ..لظهر ذلك في الاداء.
من ثم فان خلافات اللاعبين مع المدير الفني تحسب على اللاعبين وليس على المدرب.
ولاءالدين اذا كان وهو في هذه السن يختلف مع مديره الفني ..يبقى لنا ان نقول لا تنتظروا منه شيئا.
هيثم مصطفى باسمه الكبير وتاريخه العريض ..عندما اختلف مع غارزيتو ..اطاح البرير بكابتن الهلال وقائده.
واطاح كذلك باللاعب علاءالدين يوسف.
ان كان الكاردينال يطيح بالمدرب لانه اختلف مع لاعب فان ذلك (ضعف) آخر يظهر في الكاردينال.
الكاردينال قال ممكن كل دقيقة اجيب مدرب للهلال ..هي قالوا ليك فلاحة.
نظرياتك دي يا الكاردينال اعملها في (الجوهرة)..فريق الكورة عليك الـله ابعد عنو.
الاخطاء التى يقع فيها الكاردينال يقع فيها لأن هناك اعلام يطبل له في كل الاشياء.
لو جاب مدرب يطبلو ليه.
لو جاب مدرب يطبلو ليه.
لو سجل لاعب يطبلو ليه.
لو شطب لاعب يطبلو ليه.
هسع طارق العشري دا موش طبلوا في جيتو للكاردينال كدا.
الكاردينال لو شال طارق العشري بكرة ح يطلعوه بطل...ويطبلوا ليه برضو.
وح يقولوا بيبحث عن مصلحة الهلال.
وما زلت اخشى ان يتم تعيين المهندس محمد عبداللطيف هارون (طبيب) للفريق.
....
عاجل : لا الصور ولا القرارات (الفردية) ولا (الكسكتة) يمكن ان تصنع (بطل).
__________________
كمال محمد (قجه) غير متواجد حالياً   رد مع اقتباس
قديم 02-22-2016, 07:33 PM   #335
كمال محمد (قجه)
:: المشرف العام ::
 
الصورة الرمزية كمال محمد (قجه)
 
تاريخ التسجيل: Feb 2010
الدولة: المملكة العربية السعودية - الرياض
المشاركات: 45,145
افتراضي

اضافة (الحزن القديم) لاستخراج (الرقم الوطني)
الخميس 18 فبراير 2016 الساعة 16:29
وردي يقول : (عندما امتحنت جاء ترتيبي رقم 41 وهو ما أثار شيئا من الحزن عند اهلي)
جواز السفر كان (اخضر) ثم اصبح (ازرق) – لماذا لا يصبح (وردي)
(شندي) فيها ذلك (العبق) الذي يعطي الذين يمرون عبرها ذلك الخلود وذلك التميز
وضعنا (وردي ) في عيوننا لتتحول العيون من (عسلية) الى (وردية)
عندما رحل خليل فرح ولد محمد عثمان حسن وردي في 19 يوليو 1932 في (صواردة) لتخلف (عازة في هواك) – (احبك بتضحك واحبك عبوس).
حواء هذا الوطن ولادة ...فعندما رحل الخليل جاء وردي ...عملاقان يفصل بينهما (نهر).
وردي قال في حوار شهير لمجلة (المجلة) ابدع فيه السر سيد أحمد توصيفا وتوثيقا انه كان قد حصل على (الطمبور) لساعة واحدة مقابل غسل صحون (100) طالب في اليوم.
وقد جاء في الحوار : (كانت المدرسة توجد في (عبري) على مسافة 28 كلم من (صواردة) وقد دخلتها ومكثت في الداخلية ومعي رغبتي في تعلم الطمبور ، واذكر انني وجدت مساعد طباخ (مرمطون) يدعي عوض عبدالغني من بلدة (عمارة) كان لديه طمبور ويطلب مني غسيل صحون الطلاب قبل ان يسمح لي باستعارة طمبوره. وكان الاتفاق ان اغسل صحون 100 طالبا يوميا ويقوم هو باعطائي الطمبور لفترة ساعة من الزمان).
هذه الارادة والعزيمة التى جعلت ودري يغسل صحون (100) طالبا يوميا مقابل الحصول على (الطمبور) .. هي التى جعلته بتلك الاحترافية والابداع العظيم.
ليس هناك فنان واحد في هذا الجيل مستعد ان يغسل صحن واحد لكي يتعلم مثلا العزف على (العود).
وردي عملها في سبيل الحصول على (الطمبور) لساعة واحدة فقط...وردي يفعل ذلك ويغسل صحون (100) طالب يوميا وعمره وقته (11) عام فقط.
العبقرية تبدأ من تلك السن ...كان وردي وهو في تلك السن عندما يغني في شواطئ النهر ..يخرج اهالي القرية للاستماع لذلك الصوت الذي يبحثون عن (الحنجرة) التى خرج منها.
كان وردي عندما يترنم ببعض المقاطع في مدرسة (عبري) وداخليتها كان يسمعه (ابراهيم عمر النحاس) ناظر مدرسته فيضرب الشباك بعصاه فيفتح وردي النافذة ويقول له : (ما تخاف يا محمد انت بتقول شنو؟).
يرد وردي بصوت مرتجف ويقول له : (بمدح).
فيضيف ناظر المدرسة : (صوتك سمح ، امدح)...ثم يقول له يا ولدي انت يا ح تصبح غناي يا ممثل.
هذا الناظر الذي تبنأ لوردي بتلك المكانة ..وردي غنى في زواج بناته السبعة ..تكريما له كنوع من الوفاء والتقدير.
ومن حكاية وردي التى تؤكد لنا ان العبقرية والموهبة لا تحددها (نتائج) المدارس فقد يحزر الطالب درجة متقدمة فيتأخر في الحياة وقد يكون الطالب متأخرا في المدرسة فيتقدم في الحياة.
يقول وردي في حواره الشهير الذي يشكل مرجعية اولى لتاريخ وردي : (من جملة طلاب سبع مدارس من بينها مدرستنا كان المطلوب فقط 40 طالبا ليدخلوا مدرسة حلفا الوسطى من مدارس المرحلة الاولية في المنطقة . وعندما امتحنت جاء ترتيبي رقم 41 وهو ما أثار شيئا من الحزن عند اهلي).
في عام 1954 حصل الفنان محمد وردي على اول (عود) يخصه وحده وذلك بعد اشترى له ابوراس ايوب ذلك العود بعد ان كان وردي قد تعلم العزف على العود في منطقة (شكت).
العود هذا كان ثمنه (3) جنيهات ..وكان راتب وردي وهو مدرسا (9) جنيهات.
وردي حتى رحيله كان يحتفظ بهذا العود ..الذي قدم لنا (لو بهمسة) بكل ذلك الاثر والضجيج الذي ملأ الدنيا ابداعا.
اما اول راديو اغتناه الفنان محمد وردي في منطقة صواردة فقد كان في عام 1952م...وكان ثمنه (5) جنيهات.
فيه كان يسمع لابراهيم عوض وحسن عطية وابراهيم الكاشف.
هكذا كانت مملكة وردي تؤسس بهذه البساطة والاجتهاد – والبحث الدائم...لذلك كانت (قيمة) وردي كبيرة – لأنه حصل على تلك الادوات بعد معاناة وجهد.
في عام 1956 ذهب الفنان محمد وردي الى مدرسة التدريب في شندي وبقى فيها حتى يوليو 1957م.
يخيل ان (شندي) فيها ذلك (العبق) الذي يعطي الذين يمرون عبرها ذلك الخلود وذلك التميز.
من الصدف العجيبة ان وردي في مدينة شندي درس الفنان الطيب عبداللـه الذي كان (مشاكسا) حسب تعريف وردي له...وقد نال الطيب عبداللـه (علقة) من وردي في حصة الرياضيات.
في شندي ايضا إلتقى محمد وردي بالفنان ابراهيم عوض الذي كان وردي معجبا به ..وردي وزع تذاكر حفلة ابراهيم عوض في شندي.
محمد وردي في شندي منعوه في البدء مقابلة ابراهيم عوض ..رغم من انه وزع (200) تذكرة من تذاكر الحفل.
وعندما سمح له اخيرا بمقابلته يقول الاستاذ السر سيد أحمد ان وردي قال لابراهيم عوض : ( انت فنان عظيم وأنا احبك جدا واقوم بتقليدك ، والناس تقول ان صوتي جميل ..من فضلك هل ممكن ادخل الاذاعة؟).
فيرد ابراهيم عوض وهو يلبس بدلة سوداء تلمع وكرافتة حمراء : (مسألة الاذاعة دي صعبة شوية).
بعد فترة حسب رواية وردي للسر سيد احمد جاء الفنان احمد المصطفى ونزل في منزل الدكتور احمد حسن آدم فذهب له محمد وردي واخذ منه (العود) وغني لابراهيم عوض ..فقال له احمد المصطفى : (انت ليه بتقلد ابراهيم عوض ، انت صوتك اجمل منه .. واجمل من صوت اي فنان).
من شندي بدأت تظهر علامات وردي...وبدأ حلم الخرطوم يكبر عنده.
في عام 1957م ..كانت حدائق الخرطوم اكثر (ثمرا) ..كان (البرتقال) اكثر (حلاوة) والازهار اكثر (تفتحا).
النخل مع قلته في العاصمة – إلّا ان الناس شاهدوا تمايله (طربا) بصورة اكبر من تلك التى اعتاد عليها الناس في طرب النخيل.
حتى (الصيف) في ذلك العام كان (ربيعيا).
حتى الليالي (القمرية) في ذلك العام كانت اكثر (فرحا) وهى تفج ظلمة تلك (الليالي) ووردي يسردب بـ (القمر بوبا).
ذلك العام كان هو العام الذي جاء فيه محمد وردي للخرطوم – احتفى به اولاد اهله (النوبيين).
ومنحوا (القهوة) بفضله تلك (النكهة) التى تعرف بها الآن.
قدر وردي كان ان يغني في الخرطوم في بيت المال في زواج صلاح حسن القاضي ليغيب ابراهيم عوض او يتأخر قليلا عن الحضور وهو فنان الحفل الاساسي فيغني وردي.
ليقف وردي لاول مرة امام المايكروفون ليردد اغنيات ابراهيم عوض ..فليس هناك احد يعرف اغنيات وردي وقتها او يعرف وردي نفسه.
ابراهيم عوض ..وصل للحفل بعد الساعة الثانية صباحا ..وحفلات ذلك الزمن تستمر حتى شروق الشمس – غير ان العريس صلاح حسن القاضي استقبل ابراهيم عوض في الباب وشكره وقال له ما في داعي تغني بعد كدا.
ذلك كان لأن محمد وردي نال اعجاب الحضور وحصل على ادهاشهم ليغلب وردي في اول حفلاته الفنان الذي يغني له اغنياته.
في يوليو 1957 دخل وردي للاذاعة لاجازة صوته من لجنة تتكون من مدير الاذاعة متولي عيد ونائبه عبدالرحمن خانجي وكبير المذيعين بكر خاطر وعلى شمو الذي اوصاه متولي عيد على متابعة ورعاية هذا الفنان الجديد.
وردي في تلك الجلسة غنى لهذه اللجنة (3) ساعات متواصلة حتى كادت ان تفوتهم صلاة الجمعة (اليوم كان جمعة) ..واللجنة في الغالب كانت لا تستمع للفنان اكثر من ربع ساعة.
اللجنة لم تكتف باجازة صوت وردي فقط ..بل اتصلت بوزير الحكومة المحلية الذي اتصل بحسن نجيلة وكان وقتها مفتشا للتعليم وطلبوا منه نقل محمد وردي من شندي ليعمل معلما في الخرطوم.
استأجروا له منزلا في الديوم ..(من غريب الصدف ان مصطفي سيد احمد عندما جاء للخرطوم من ود سلفاب ايضا استأجر في الديوم).
في عام 1957 التقي وردي باسماعيل حسن الذي اعجب به وكتب له اغنية (يا طير يا طاير) ليلحنها له خليل احمد...وكتب له معها (الليلة يا سمراء)..ليقدمها وردي في حفل الاذاعة لاول مرة في 19 يوليو 1957م.
يا طير يا طير او (الحب والورود) كانت فيها بساطة (المفتاح) ..منها بدأ وردي وتشكلت علاقة اعظم ثنائيات الاغنية السودانية.
بعد ذلك كتب وردي بنفسه اغنية (اول غرام) ولحنها وكانت تحكي عن قصة حب عاشها وردي في الخرطوم..يقول وردي عنها لمعاوية جمال الدين : (انا رجل ريفي وفدت الى الخرطوم في سن ليست صغيرة و (اول غرام) كان اول حب لي في المدينة..قد اكون احببت في قريتي كثيرا ، لكن اغنية (اول غرام) كانت تعبيرا عن اول قصة حب لي في المدينة). الاسم الصحيح للاغنية هو (ليالي اللقاء) وليس (اول غرام) . هذه الاغنية قادتنا إلى سلسلة من الاغنيات ، إلى ان انتهت قصة الحب في العام 1962 ، وكانت بدأت في العام 1957م).
وردي غني لملهمته تلك صدفة وحنية وغلطة وخاف من اللـه والمستحيل وسؤال التى قدمها في طوكر لاول مرة سنة 1959م.
قلبها غني وردي في عام 1958 اغنية (بشوف في شخصك احلامي) لكمال محيسي...وذات الشامة ايضا كانت في 1958 لاسماعيل حسن.
وقدم معها في حفلاته الاذاعية الاولى ( يا سلام منك أنا آه) و (ليه نسيت ايامنا).
في عام 1958 اشتري محمد وردي اول عربة خاصة به.
هكذا يبدأ العملاق.
في الاكتوبريات قدم وردي العديد من الاغاني المحتشدة بالوطن ..فغني للفيتوري والطاهر ابراهيم وصلاح احمد ابراهيم ومحمد المكي ابراهيم.
وقدم وردي اغنية (اصبح الصبح) ولحنها قبل ثورة اكتوبر ثم قدمها بعد 1964.
في تلك الفترة لم يغن وردي عاطفيا غير (يا اعز الناس) للحلنقي و (عذبني) لمحمد يوسف موسي.
قبلهما طبعا قدم وردي (الوصية) التى لحنها برعي محمد دفع اللـه وغني (حرمت الحب والريدة) للطاهر ابراهيم كلمات والحان.
في 1966 غني وردي للتجاني سعيد (من غير ميعاد)...وغني له (قلت ارحل) سنة 1972 بعد خروجه من سجن كوبر وقد لحنها وردي في السجن دون الاستعانة بآلة موسيقية.
يقول وردي عن (قلت ارحل) انها الاغنية التى يغنيها بكل وجدانه وكامل صوته..وقد بكي وردي في هذه الاغنية عندما قدمها في حفل لندن سنة 1995م.
وغني وردي في فترة اكتوبر (بسيماتك) لعلي عبدالقيوم وقدم (الود) لعمر الطيب الدوش ...وغني للدوش في 1973 (بناديها) بعدها غني للدوش (الحزن القديم).
الاغنيات التى شكلت منعطفات في حياة وردي حسب قوله هي المستحيل وخاف من اللـه وبعد ايه.
بقت (الود) علامة فارقة في الكلمات وفي اللحن ..والتوزيع.
بها دخل وردي على عمق الموسيقي.
الحزن القديم ..تشكل الحالة الفلسفية كلها للاغنية السودانية ...هذه الاغنية الاوفق لاشتراط استخراج (الرقم الوطني).
......
ملحوظة : ولسه.
هوامش
من حب الناس لوردي وضعوه في عيونهم ..لتتحول العيون من (عسلية) الى (وردية).
الموسيقار عوض احمودي من اكثر الذين رافقوا وردي وصاحبوه ..احمودي يقول كان وردي من (اكرم) الفنانين الذين عرفهم.
اما تواضع وردي فهذا شيء اشهد له به فقد حاورنا وردي ونحن في خانة الصحفيين (المتدربين).
مع ذلك كان يفتح لنا باب منزله ومكتبه ..ويمنحنا شعور اننا كبار.
اسحق الحلنقي قدم لوردي اكثر من (17) ونافس اسماعيل حسن في عدد الاغنيات التى كتبها لوردي.
تبقى اغنية اعز الناس وعصافير الخريف من اشهر ثنائية وردي والحلنقي.
وتأتي الصورة واستنينا وعطر الندي التى كانت من اوائل الاغنيات التى غناها وردي للحلنقي.
وهناك اقابلك وغيرها من الاعمال العاطفية الخفيفة والجميلة.
عندما غني وردي لمحمد علي ابوقطاطي هاجمته الصحافة في التغني لابوقطاطي.
ثم جاء وحقق وردي باغنيات ابوقطاطي طفرة اخرى للاغنية السودانية.
.......
عاجل : ونواصل.
__________________
كمال محمد (قجه) غير متواجد حالياً   رد مع اقتباس
قديم 05-27-2016, 05:03 PM   #336
كمال محمد (قجه)
:: المشرف العام ::
 
الصورة الرمزية كمال محمد (قجه)
 
تاريخ التسجيل: Feb 2010
الدولة: المملكة العربية السعودية - الرياض
المشاركات: 45,145
افتراضي

دق الدلجة .. محمد عبدالماجد يكتب :. الوك.. (شبيبة القيروان) كيف معاك!!؟
محمد عبد الماجد
• قبل ما أقول اي شيء.
• واقعد انظر ليكم.
• وادخل ليكم في حتة صعبة شوية.
• اقول ليكم الموضوع دا.
• في مصر وعلى عينك يا تاجر – يتحدث الاعلام المصري هذه الايام عن هذا الخبر.
• (أنهى مسؤولو النادي الأهلي اتفاقهم مع مروان محسن مهاجم الإسماعيلي على الانضمام إلى القلعة الحمراء بداية من فترة الانتقالات الشتوية في يناير.واتفق مسؤولو الأهلي مع تامر النحاس وكيل اللاعب على تجهيز عرض خارجي في أحد الدوريات الخليجية من أجل انتقال مروان لمدة 6 أشهر، يعود بعدها إلى الأهلي، خاصة في ظل وجود صعوبة في انتقال اللاعب مباشرة من الإسماعيلي نظرا للحساسية الشديدة بين جماهير الناديين، وكان عمرو السولية اخر لاعبي الإسماعيلي المنتقلين إلى النادي الأهلي قد انتقل إلى الشعب الإماراتي لمدة ستة اشهر كترانزيت قبل العودة الى القلعة الحمراء).
• فهم والله.
• هذا خبر تتداوله المواقع والصحف المصرية ..(قدام ناس الاسماعيلي).
• الاسماعيلي ما بقدر يقول اي حاجة.
• مروان محسن افضل مهاجم في الدوري المصري الآن.
• شفتوا الكلام دا ..بيحصل بالواضح وفي مصر (ام الدنيا) ، ولا في زول بيقدر يقول حاجة.
• انتقل عمرو سولية الى الاهلي بهذه الطريقة من الاسماعيلي عبر (كبري) فريق (الشعب) الاماراتي وجاء ولعب من بعد في الاهلي المصري.
• السولية يلعب الآن في الاهلي.
• ناس الاسماعيلي ما قدروا يقولوا شيء.
• ولا كلمة.
• وقبل ذلك كان قد انتقل (سيد معوض) بعرض تركي من نادي الاسماعيلي من اجل ان يرجع ويلعب في الاهلي.
• وحدث نفس الشيء لمحمد بركات الذي لعب في (الاهلي السعودي) منتقلا له من الاسماعيلي لكي يلعب في الاهلي المصري بعد ذلك.
• اي حاجة بالقانون.
• وانتقال شيبوب من المريخ الي شبيبة القيروان تم بالقانون لينتقل اللاعب من بعد الى الهلال بطريقة سلسة جدا.
• وبالقانون.
• وعلى عينك يا تاجر.
• ناس المريخ لغاية الآن ما وقعت ليهم القصة ، ما فهموها.
• صعبة عليهم شوية.
• اذا كانت هناك (ثغرة) في عقد اللاعب (المحترف)..فان لوائح الفيفا حللت استعمالها…عاوزين انتوا تبطلوا (ثغرة) في عقد لاعب (هاوي).
• والله فالحين.
• شاطرين.
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• ندخل ليكم على (البامية المفروكة).
• حكاية (الوك) اللاعب الجنوب سوداني الآن تمر بشغل (هلالي) عالي.
• لجنة التسيير بتاعة المريخ الموضوع دا ما بقع ليهم.
• الشغل دا كبير عليهم شوية.
• شيبوب (عد فات).
• عدي بينا ..عدي بينا يا ريس.
• ما تنزل المركب ..خلى الشباب يركب ..يا ريس.
• شيبوب عدى.
• نشوف الوك.
• في الافلام المصرية ..لمن المدير يكون قاصد ليه موظف ..بقوم يحولو لقسم الارشيف.
• الموظف من يحولوه لقسم الارشيف ..اعرفو طوالي ان هذا الموظف (مقصود).
• الوك ما عاوز اقول ليكم اتحول لقسم (الارشيف) – لكن بقول ليكم الاكيد ان المريخ الذي لم يستفد من (الوك) في الست شهور الماضية ، لن يستفيد منه في الست شهور القادمة.
• والسبب (الهلال).
• قلنا ليكم ناس الهلال بقوا يشتغلوا شغل عالي.
• الوك وقع في كشوفات المريخ كلاعب (وطني) وفشل المريخ في احضار مستند يثبت ان اللاعب (سوداني)..ليبطل الاتحاد العام تسجيله.
• وبما ان المريخ فشل في ان يأتي باللاعب الوك من اجل التوقيع في كشوفات المريخ كلاعب اجنبي (محترف) حتى انتهاء فترة التسجيلات ، يبقى من الاستحالة ان يستفيد منه المريخ في الفترة القادمة.
• الدليل على ذلك ..ان المريخ بعد ان صرف النظر عن (عمر بخيت) عاد في اخر اللحظات واعاد قيد لاعبه عمر بخيت مرة اخرى.
• يعني بي بساطة كدا…الوك منعه من التوقيع في كشوفات المريخ …الهلال.
• وعمر بخيت رجعه لكشوفات المريخ ..الهلال ايضا.
• هذا يثبت ان الهلال هو الذي يحدد تسجيلات المريخ وهو صاحب الكلمة العليا فيها.
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• الهلال في الوقت الحالي طبعا ما ممكن يستفيد من (الوك) ، لأن اللاعب لم يوقع في كشوفات الهلال في فترة التسجيلات.
• الكرت عند الهلال ، لكن الاهم من الكرت توقيع اللاعب في كشوفات الهلال في مباني الاتحاد العام وامام لجنة التسجيلات وفي الفترة المحددة للتسجيلات.
• اللاعب لو كان (سودانيا) كان سوف يكون امامه اسبوع اخر بعد انتهاء فترة التسجيلات.
• لكن اللاعب (اجنبي)..وهو لو كان (سودانيا) ما كان ح يكون في مشكلة في توقيعه للمريخ.
• عشان كدا ..الوك دا ..احسن حل تودوه (شبيبة القيروان).
• وعدي بينا ..عدي بينا يا ريس.
• ما توقف المركب ..خلى الشباب يركب يا ريس.
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• في حلتنا – (في البلد يعني) كانت في عائلة مشهورة ..اي زول يكون عاوز يموت فيها بقول نفسي في (حلبة).
• الزول فيهم من يعملوا ليه (حلبة) – زولكم بنقرض.
• وبروح فيها.
• وبتكل.
• العائلة دي ..لمن يكون عندها زول عيان ..ما بشتغلوا كتير بي كلام الدكاترة ونتائج الفحوصات.
• العائلة دي كان بتنتظر زولها يقول عاوز (حلبة) ويجروا على المقابر عشان يجهزوا (القبر).
• من يطلب عصيدة الحلبة ..زولكم بنقرض.
• وبقسموا ورثته.
• الزول الكبير وقت يمرض ..اولادو بقعدو تحتو.
• يعملوا ليه اي حاجة.
• ومن يقول عاوز (حلبة) ..اولاده بقولوا ليه : لا يا حاج .. يا حاج لا..ما تقول كدا ..ما تطلب (حلبة)…اطلب اي حاجة غير (الحلبة).
• اليوم والتاني من طلب (الحلبة) زولكم بموت.
• ويتكل.
• ناس التوم ود علي ..كان عندهم ولدهم جاء راجع من الجامعة.
• شديّد ..ما عندو اي شيء.
• صداع ما بشكي منو.
• زي الحصان.
• الولد دا من دخل البيت ..قال لي امو عاوز لي (حلبة).
• امو شافتو شديد …قالت ما في مشكلة ..عملت ليه (الحلبة).
• (الحلبة) قبل ما يكملها ..باقيها في (كوريتها) – الولد مات.
• وقت الناس سألو منو؟..وقال لي اهلو ..الولد دا كان عندو شنو؟.
• اهلو قالوا ابدا ..ما عندو اي شيء ..بس طلب ليه (حلبة) قبل ما يشربها مات.
• اتكل.
• الناس قالوا لي اهلو ..طيب انتوا ما كتلتوه عديل كدا بـ (الحلبة) دي.
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• يوم داك ..مشينا نزور (الطيب ود الحنفية)…في المستشفى.
• دخلنا وسلمنا عليه.
• قبل ما نقوم منو ..قال عاوز ليه (حلبة).
• نحن من سمعنا قولة (الحلبة) – عرفنا ليك زولكم زول موت.
• زول فراق.
• دورنا (بكاسينا) ومشينا على المقابر.
• قبل ما نصل المقابر ..ضربوا لينا تلفون قالوا لينا (الطيب ود الحنفية) اتوفى.
• لا حول ولا قوة إلّا بالله…(حلبتو) ما شربها.
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• هسع يا ناس المريخ (الوك) دا نفسو في (حلبة).
• عاوز ليه (حلبة).
• اقنعوا منو ساكت.
• لو شفتوه في (شبيبة القيروان) التسجيلات القادمة ما تستغربوا.
• التسجيلات في تونس ح تبدأ قريب ..خليك جاهز يا الوك.
• تمشي وتجي من تونس تسجيلات نوفمبر.
• ما عندك اي مشكلة.
• الحاجات إلّا يقربوها ليكم بـ (الحلبة) عشان تفهموها.
• عشان تقع ليكم.
• ………
• و
• الخميس …الظهور الاول لشيبوب.
• في انتظار شيبوب.
• القناة التى سوف تنقل مباراة الهلال امام سان جورج الاثيوبي سوف تحقق مكاسب كبيرة.
• سادومبا ون وسادومبا تو.
• حاجة ما بتخلص.
• وبلاتشي كمان.
• الفترة القادمة لا بد من فتح تمارين الهلال.
• عشان لاعبي الهلال الجدد يتعودوا على الجماهير.
• خاصة ان الهلال فيه عدد كبير من اللاعبين.
• الجماهير بتعطي اللاعبين الدوافع والروح.
• مباراة المريخ مع هلال كادوقلي باقى ليها 18 يوم.
• يا ناس هلال كادوقلي خليكم جاهزين.
• شوفوا معسكركم وين؟.
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• ………
• السيدة (ل) – عندنا (دومة) في رمضان بتشيل (ليمون).
• وقرّط على كدا.
__________________
كمال محمد (قجه) غير متواجد حالياً   رد مع اقتباس
قديم 12-16-2016, 03:57 PM   #337
كمال محمد (قجه)
:: المشرف العام ::
 
الصورة الرمزية كمال محمد (قجه)
 
تاريخ التسجيل: Feb 2010
الدولة: المملكة العربية السعودية - الرياض
المشاركات: 45,145
افتراضي

من رأسي :
المريخ طلب الشيخ موكورو ..يعني لو اتعاملنا بي نفس الفهم دا ..مفروض الهلال يطلب بلة جابر.

عليكم الله هسع الكورة التى لعبها بلة جابر امام المريخ لو فكوا ليهم (21) باك في الطرف اليمين في تلك المباراة بيلعبوها.

من كراسي :
أيها الساهرون ألم تتعبوا من مراقبة الضوء في ملحنا..

ومن وهج الورد في جرحنا..

ألم تتعبوا أيها الساهرون..

محمود درويش



• في كثير من الاحياء خلونا من حكاية الاحياء دي ..في كثير من (الحلل) اذا اتيت تسأل عن (مَعلم) واضح (مكان) بارز يعني فان احد الاشخاص الذين توجه لهم سؤالك ينبري لك ويتولي مهمة وصف (المعلم) الذي تسأل عنه بهمة ونشاط…تقول عندو دبلوم عالي في الوصف.

• يقعد يوصف ليك باخلاص زي (استاذ التاريخ).

• يتقطع ليك عديل كدا في الموضوع تقول علاءالدين جبريل.

• هذا الشخص يوصف لك (المحل) الذي تسأل عنه بعد ان يجعل لوصفه كسور وبواقي ويثبت لك بالعمل ان هذا (المكان) الذي تسأل عنه في (اخر الدنيا) .. ينزل بيك ويطلع.. يشهيك العافية ويندمك علي السؤال.

• تندم بينك وبين نفسك.

• شفت الشجرة بتاعة (النبق) ديك … تمشي فوقها عديل .. شمالها في طرمبة جاز.

• في كلب قدامها ما تشتغل بيه …بهوهو ساكت ..ما بيعضي.

• طرمبة جازولين يا ابوالشباب؟.

• الطرمبة تخليها .. اول شارع تدخل شمال.

• شمال تاني.

• انت مالك عاوز تدخل شمال بي (شهادة الثانوي)…خش وخلاص – بطل كلام كتير.

• ايوة شمال .. بلاقيك شارع مقفول ادخل فيه ما تشتغل بالقفلة .. (قفلة ميتة) .. تمشي يمين في شمال في يمين .. اول شارع خليه .. تاني شارع خليه .. ثالث شارع خليه .. رابع شارع تعال راجع لي عشان اكمل ليك الوصف ، عشان جاتني مكالمة مهمة.

• انت مجبور تمشي وتجيه راجع عشان يكمل ليك الوصف.

• قلت ليكم الزول دا بشهيك العافية .. بندمك علي الساعة اللابسها.

• يوصف ليك .. ويوصف ليك في النهاية تلقي (المكان) البتسأل عنو .. انت واقف تحتو.

• الحياة في تفاصيلها فيها ذلك التعب…والوصف والجرجرة.

• ربما هذا الشيء يقودني الي شيء اخر.

• لا يقترب منه..لكن فيه بعض الشبه.

• و

• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).

• في حياة المبدعين الكثير من الغرائب التي تثير الدهشة .. لذا الفنون قرنت دائما بالجنون .. او فصل بينهما بشعرة.

• اذا توقفنا في بعض النماذج سوف نجد جملة من التصرفات الغريبة من مشاهير عرفهم كل العالم.

• مرة كتب (انيس منصور) عن الاديب الفرنسي (اونورية دي بلزاك) وقال انه كان يعاني من بعض (الوسوسة) التي تتمثل في انه كان يخرج من منزله صباحاً متخذاً شارعاً معيناً وكان في سيره هذه يجمع (نمر وارقام) المنازل التي يمر عليها فان صادف ووجد ان مجموع تلك الارقام عدد زوجي استبشر بيومه هذا وتفاءل به.

• اما اذا كان مجموع ارقام المنازل عدداً فردياً فانه كان يعود من حيث اتي ليتخذ شارع اخر ثم يكمل مشواره فان كان العدد في نهاية مشواره عدداً فردياً عاد مرة اخري حتي يحصل علي مجموع زوجي لارقام المنازل التي تصادفه في الشارع.

• الكلام دا قلتو ليكم ..ما تقعدوا تفتحوا لي (عيونكم) زي ضلف الدولاب الما بقفل.

• بلزاك مع هوسه هذا كان صاحب انتاج ضخم رغم انه رحل من الدنيا وعمره لم يتجاوز الـ 51 عاماً.

• مع انتاجه الضخم هذا ومجلداته التي نشرها في حياته فقد تميزت اعماله بالجودة والاتقان وكانت الدهشة في ان تلاميذه اكتشفوا بعد رحيله انه خلف الكثير من الاعمال التي لم ينشرها ولم يصرح بها لتتسع دائرة دهشتهم.

• عرف عن بلزاك انه كان يكتب بمعدل 18 ساعة في اليوم ، أي ان هنالك ست ساعات فقط لا يكتب فيها في كل يوم.

• كذلك يحكي عن بلزاك انه في بداياته عندما كان يعرض قصصه علي الصحف كان ينصحه الصحفيون بان يمارس عملاً اخر غير الكتابة .. وقتها كانت الكتابة عملاً مناط بالنبلاء فقط.

• شفتوا الحسادة دي.

• الكتابة زمان كانت عمل (النبلاء)..ما بخلوا ليهم زول يكتب ساكت.

• هسع اي زول بيكتب.

• و

• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).

• (وليد رباح) تحدث عن بعض التصرفات الثقيلة لمشاهير يحسبهم الناس لا يقربهم عيب ابداً.

• وليد قال نقره لعرض الصورة في صفحة مستقلةهنالك أسماء شهيرة عرف عنها بعض التصرفات الغريبة فنابليون كان يهوى التلصص من ثقب الباب على زوجات قادته.

• الملك فاروق كانت هوايته سرقة أدوات الموائد الفضية أو النحاسية في الدعوات مع المجاهرة بتلك السرقة .

• أما تشرشل فكان يهوى تدخين السيجار في غرفة زوجته المصابة بالسرطان.

• كذلك تحدث التاريخ عن الخليفة المستعصم بالله فقد كان ثقيلا إضافة إلى بخله .. كان عطاؤه للشعراء كلاما من نفس بضاعتهم. ويرفض منحهم مكافآت عن أشعارهم التي يمدحونه بها . أما ثقله فقد دلل عليه التدخل في مكياج وصيفات زوجته إن كان مناسباً أو غير ذلك ) والحديث لوليد رباح.

• هنا يا تري ماذا عن هوايات النجوم عندنا.

• السيد الصادق المهدي من هواياته…ممارسة لعبة كرة التنس.

• الفنان شرحبيل احمد هويته الرسم وهو في الاصل فنان تشكيلي.

• نلاحظ ان هوايات النجوم هنا ..متكتم عليها..لا يعرفها احد…كأنها ممنوعة من النشر.

• لذلك نحن لا توجد عندنا مثل هذه الثقافات.

• و

• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).

• اي زول شغال على كيفو.

• معاوية فداسي ..هوايته بعد ما يكمل اللاين ..يرجع تاني للخلف ..زي وصف الزول الفوق العمود دا.

• موسى الزومة لو تركيزه البعملو مع (الكشافات) بعملوا في (المرمي) كان نافس كلتشي على لقب الهداف.

• بلة جابر – حقيقة اول مرة اكتشف خطورته في مباراه الامير الاخيرة امام المريخ.

• عبداللطيف بويا ..لو قاعد في الكنبة ممكن يعمل ليك (مخالفة).

• اطهر الطاهر ..احسن زول بيعكس الكورة في السودان.

• بس مشكلتو ما برجع سريع.

• ومشكلته التانية ..الكورة لو اتقطعت منو بتعمل خطورة على مرمى الهلال.

• انتبه يا كابتن.

• مصعب عمر ..الغلطة البعملها الليلة بكررها ليك بالكربون بكرة.

• ولا بتعب فيها.

• قصدت احدثكم عن (الباكات) ديل ..عشان ديل اشهر ناس عندنا في السودان.

• امشي اي حلة واسأل ليك من بيت اي (باك)…الحلة كلها تقعد توصف ليك في البيت.

• ما في اشهر من (الباك).

• و

• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).

• ……………

و
• تاني وتاني..مطلوب تركيز اكبر في مدني.

• الاهلي مدني بيلعب بحماس شديد.

• ويجب ان يرتفع الحماس عند لاعبي الهلال يوم الجمعة.

• المباراة ما تسجلوا فيها هدف ..وتسكتوا على كدا.

• الهدف الواحد اصلو ما مضمون.

• الهدف الوحيد ..بيجعل دوافع الفريق المنهزم الهجومية اكبر.

• عشان كدا ما تتغطوا على روحكم بالهدف الوحيد.

• و

• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).

• ……….

• السيدة (ل) – الزول وقت يكون عندو رأي في اللحمة ليه بشيلها مع العدس.

• والعدس ما عندو اي ذنب.

• وقرّط على كدا.

__________________
كمال محمد (قجه) غير متواجد حالياً   رد مع اقتباس
إضافة رد

أدوات الموضوع
انواع عرض الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

كود [IMG]متاحة
كود HTML معطلة




الساعة الآن 12:59 AM


Powered by vBulletin™ Version 3.8.7
Copyright © 2020 vBulletin Solutions, Inc. All rights reserved. منتديات